Kómirsýtekter men ýrandy barlaý men óndirý jónindegi 12 kelisimshart buzyldy
«Jańa energetıkalyq qýattardy iske qosý boıynsha Aqtóbe oblysynda jylý elektrstantsııasynda 57 MVt qosyldy. 2023 jyly Atyraý jáne Qaraǵandy oblystarynda 225 MVt iske qosylatyn bolady. Bıyl jalpy qýaty 385 MVt bolatyn 12 jańartylatyn energııa kózderiniń jobasy iske asyryldy. 2023 jyly qýattylyǵy 157 MVt bolatyn taǵy 14 jańartylatyn energııa kózderiniń jobasyn iske qosý josparlanýda. Qýaty 1,2 GVt manevrlik generatsııa jobalary jáne qýaty 440 MVt jańartylatyn energııa kózderiniń jobalary boıynsha aýktsıondyq saýda-sattyq sátti ótkizildi», - dedi Úkimet basshysy.
Onyń atap ótýinshe, «Jylý energetıkasy týraly» zańnyń jobasy ázirlenip jatyr.
«2023 jyldyń 1 toqsanynda elimizdiń barlyq jylý elektr stantsııasy jáne elektr jelileriniń aýdıti aıaqtalady. Buǵan qosa, jylý jelileriniń aýdıti ótkiziledi. Ulttyq elektr jelisin jańǵyrtý, onyń ishinde Batys Qazaqstannyń elektr jelilerin Biryńǵaı elektr energetıkalyq júıege qosý boıynsha jumystar júrgizilýde», - dedi Premer-Mınıstr.
Úkimet basshysynyń aıtýynsha, ázirlenip jatqan «Tarıfti ınvestıtsııalarǵa aıyrbastaý» baǵdarlamasy elektr, jylý jáne qubyr jelileriniń tozýyn 20 paıyzdyq tarmaqqa tómendetýge múmkindik beredi. Bul úshin 3,8 trln teńgege deıin ınvestıtsııalardy tartyp, 134 myń shaqyrymnan astam ınjenerlik jelilerge jóndeý júrgizý qajet. Tıisti erejeler osy aptada bekitiledi.
«Kómirsýtekter men ýrandy barlaý men óndirý jónindegi 304 kelisimshartty revızııalaý boıynsha jumys júrgizilýde. Ázirshe buzýshylyqtar bar 27 kelisimshart aıqyndaldy. Olardyń 12-si buzyldy. Basqalary boıynsha jumys jalǵasýda», - dedi Álıhan Smaıylov.
