Kómirmen jumysty basqa vedomstvoǵa ysyrǵan Bozymbaev Premer-Mınıstrdiń áziline ilikti
ASTANA. QazAqparat - Kómir salasyn qadaǵalaýdy basqa vedomstvoǵa ysyryp tastaǵan Energetıka mınıstri Qanat Bozymbaev Premer-Mınıstrdiń áziline ilik boldy, dep habarlaıdy QazAqparat tilshisi.
Búgingi Úkimet otyrysynda Qaraǵandy oblysynyń 6 aıdaǵy áleýmettik-ekonomıkalyq damýy jaıynda baıandaǵan óńir basshysy Erlan Qoshanov áriptesterine qazirden bastap kómirdi satyp ala berýdi usynǵan bolatyn.
«Byltyrǵy jylǵy jaǵdaı qaıtalanbas úshin bıyl Shubarkól razrezinde kómir jetkilikti. Biz basqa oblystarmen birigip, kestesin jasadyq. Sondyqtan áriptesterime ótinishim, sol keste boıynsha qazirden bastap kómirdi shyǵara bergen durys bolady», - degen edi ol.
Osy oraıda Baqytjan Saǵyntaev Energetıka mınıstri Qanat Bozymbaevqa bul máseleni baqylaýǵa alýdy tapsyrǵan edi. Alaıda ol osy aıdan bastap kómirge qatysty barlyq másele Investıtsııalar jáne damý mınıstrliginiń qaraýyna berilgenin aıtyp qutyldy.
«Qaıyrbek Aıtbaıuly (Investıtsııalar jáne damý vıtse-mınıstri), Sizderge ysyryp tastapty ǵoı. «Іsker» mınıstrlikter solaı jumys isteıdi. Paıdasyz nárseni shyǵaryp tastaıdy, paıdalysyn qaldyrady», - dep ázildedi Premer-Mınıstr.
