Kómirmen turaqty qamtamasyz etý maqsatynda arnaıy shtab quryldy

ASTANA. QazAqparat - Qos mınıstrliktiń birlesýimen qurylǵan shtab jylytý maýsymynyń turaqty ótýin qamtamasyz etedi. Bul týraly OKQ-de ótken baspasóz máslıhatynda aıtyldy, dep habarlaıdy QazAqparat tilshisi. 

QR Energetıka mınıstrligi Investıtsııalar jáne damý mınıstrligimen birlesip qurǵan shtabtyń quramyna mınıstrlikter men ákimdikterdiń jaýapty tulǵalary endi. 

Energetıka mınıstrligi buıryq negizinde kúzgi-qysqy kezeńge daıyndalý men elektr stantsııalarynda otynnyń normatıvtik qoryn jınaqtaýdy kúndelikti negizde qamtamasyz etýge mindettelgen. Al Investııalar jáne damý mıınıstrligi aptalyq negizde kómir óndiretin uıymdardan kómir óndirý men tıeý, kómirdi kommýnaldyq sektor men halyqqa tasymaldap jetkizý isin monıtorıngten ótkizip otyrady. 

«Bul shtab kúzgi-qysqy jylytý maýsymyn qamtamasyz etýmen qatar, oǵan baqylaý jasaıdy. Ár apta saıyn otyrys ótip, jumys barysy qadaǵalanyp otyrady. Sonyń negizinde qaı óńirlerde kómir tapshylyǵy bar nemese jetpeı jatyr - sonyń bári anyqtalyp, nazarda bolady. Odan bólek, qaı óńirlerde kómir kelisimsharty jasalmaǵan nemese baǵa kóterilgen bolsa, shtab ol máseleni de jedel sheship, jiti baqylaýynda ustaıdy», - dedi QR Energetıka mınıstri Qanat Bozymbaev.

Energetıka mınıstriniń aıtýynsha, shtab óz jumysyn bastady. Atap aıtqanda, tamyzdyń ortasynda júrgizilip jatqan jumys aıasynda problemalyq máselelerdi qarastyrý jáne olar boıynsha sharalar qoldaný jóninde oblystarmen selektorlyq keńes ótkizilgen.