Kómirmen otyrǵan mektepter men dúkenderge aıyppul salǵanymyz durys emes - senator
ASTANA. QazAqparat - Búgin Parlament Senatynyń agrarlyq máseleler, tabıǵatty paıdalaný jáne aýyldyq aýmaqtardy damytý komıtetinde Parıj kelisimin ratıfıkatsııalaý máselesi qaraldy.
Jahandyq klımattyń ózgerýi aıasynda atmosferaǵa shyǵarylatyn kómirsýtek qaldyqtaryn barynsha azaıtýdy kózdeıtin kelisimge qatysty birde-bir suraq týyndaǵan joq. Alaıda senator Jeńis Nurǵalıev osy máselege qatysty mańyzdy bir problemany kóterdi, dep habarlaıdy QazAqparat tilshisi.
Senatordyń ózi Parıj kelisiminde kórsetilgen barlyq máselelerdi qoldap otyr. Alaıda sonyń barlyǵy jergilikti jerge deıin jetýi kerek dep sanaıdy. Otandyq zańnamanyń bir-birine qaıshy tustaryn da alyp tastaý qajet.
«Bizde aýyl sharýashylyǵy salasynda qıdy óndirýmen aınalysatyn sharýalarǵa salyq salady. Menińshe, ol durys emes. Sosyn biz atmosferaǵa shyǵarylatyn qaldyqtarǵa shekteý qoıamyz dep otyrmyz. Al jergilikti jerdegi mektepterdiń túgeli derlik kómirdi jaǵyp jatyr. Aýaǵa SO2-niń biraz mólsheri shyǵarylady. Sol úshin jaza qoldanamyz dep otyrmyz. Demek, taǵy bir tekseriske jol ashylady. Kómirdi jaǵyp otyrǵan qanshama dúkender bar. Endi, olar da aıyppul tóleıtin bolady. Osyny keńinen túsindirip berýimiz kerek. Qazirgi bastama bızneske keri áserin tıgizbeýi tıis», - dedi J.Nurǵalıev.
Osy oraıda senator Parıj kelisiminde kórsetilgen mindettemelerdiń zańdy kúshi joq ekenin taǵy bir márte eskertti. Bul degenimiz,bárine jappaı aıyppul salynbaıdy. Degenmen, halyq arasynda atalǵan bastamany jan-jaqty túsindirse, aýaǵa shyǵarylatyn kómirsýtek qaldyqtaryn órkenıetti jolmen azaıtýǵa da bolady.
Aıta keteıik, komıtettiń keńeıtilgen májilisinde barlyq depýtattar Parıj kelisimin Senattyń jalpy otyrysyna shyǵarýdy qoldady. Buǵan deıin atalǵan qujatty Májilis depýtattary qoldap, óz áriptesteri - senatorlardyń qaraýyna jibergen bolatyn.
