Kómirdiń sapasy men baǵasyn baqylaýǵa alý kerek – Altaı Kólginov
NUR-SULTAN. QazAqparat - Elorda ákimi áriptesterimen kóshpeli keńes barysynda turǵyndardy kómirmen ýaqytyly qamtamasyz etý, nysandardy jylytý jáne gazdandyrý máselelerin talqylady, dep habarlaıdy qalalyq ákimdiktiń baspasóz qyzmeti.
«Ár maýsym saıyn jaǵdaı qaıtalanýda: kezektiń paıda bolýy, kómir baǵasynyń kóterilýi, halyq kómirmen ýaqtyly qamtamasyz etilmeıdi. Bul máseleni baqylaýda ustaý qajet. Jeke sektorǵa kómirdi aldyn ala jetkizý qajet, baǵalar belgilengen deńgeıde bolýy tıis. Kómir sapasy da óte mańyzdy. Sapasyz kómir ekologııaǵa áser etedi. Kómirdiń sapasyn, jetkizilýin jáne baǵasyn aýdan ákimderi men basshylarmen birge baqylaýda ustaýlary qajet», - dedi A.Kólginov.
Jyl saıyn 500 myń tonna kómir tutynylady, elordaǵa 125 myń tonna jetkizildi. Ótken jylmen salystyrǵanda bul san 2 ese ósti. Jeke sektorǵa 105 myń tonna tasymaldandy. Osylaısha, qalanyń 11 jerinde kómir satatyn 8 kompanııa anyqtaldy, kómirdiń barlyq túrleriniń baǵasy tirkelgen (11 myń teńgeden 12 700 teńgege deıin).
Jylý berý maýsymyna energııa kózderi jabdyqtarynyń jalpy daıyndyǵy 99% quraıdy: JEO-1-100%, JEO-2 – 98%, aýdandyq qazandyqtar – 100%. Sonymen qatar, densaýlyq saqtaý nysandary 100% - ǵa, turǵyn úı qory men bilim berý nysandary 99% - ǵa, mádenıet nysandary 93% - ǵa qamtylǵan . 1 qazanǵa deıin jylytý maýsymyna daıyndyq 100% quraıdy.
