Kómirdiń qory qajetti mólsherde jınaqtaldy – Indýstrııa mınıstri
«Aldaǵy jylý berý maýsymyna avtonomdy qazandyqtarǵa otyn qajettiligi 1,3 mln tonnaǵa jýyq kómir men 16 myń tonna mazýtty quraıdy. Búgingi tańda 1 mln tonna kómir (81%) jáne 14 myń tonna mazýt (88%) daıyndaldy. Kómir satyp alýdyń tómen kórsetkishi Almaty, Pavlodar jáne Qaraǵandy oblystarynda baıqalsa, al mazýt otynyn satyp alýdyń tómen deńgeıi Aqmola, Aqtóbe oblystarynda baıqalyp otyr. Jergilikti atqarýshy organdar avtonomdy qazandyqtar úshin otyndy ýaqtyly satyp alý jáne jetkizý jóninde shuǵyl sharalar qabyldaýy qajet», - dedi Q. Óskenbaev.
Sonymen qatar ol mınıstrlik apta saıyn halyqty jáne kommýnaldyq-turmystyq sektordy kómirmen qamtamasyz etý boıynsha monıtorıng júrgizip jatqanyn aıtty.
«Kómir óndirýshi kompanııalardyń derekteri boıynsha 2022 jylǵy qańtar-shilde aılarynda 66,4 mln tonna kómir (kómir kontsentratyn qospaǵanda) óndirildi. Bul byltyrǵy tıisti kezeńmen salystyrǵanda 106 paıyzdy qurady (2021 jyldyń 7 aı úshin 62,8 mln. tonna)», - dedi vedomstvo basshysy.
Mınıstrlik málimeti boıynsha esepti kezeńde eldiń ishki naryǵyna osy kólemdegi kómir jóneltildi:
- kommýnaldyq-turmystyq qajettilikterge jáne halyqqa shamamen 4,5 mln tonna;
- energııa óndirýshi kásiporyndarǵa 35 mln tonna;
- ónerkásip kásiporyndaryna 4,2 mln tonna;
- eksportqa 19 mln tonna.
«Іri kómir óndirýshi kompanııalary bólinisinde «Shubarkól kómir» (úlesi 10,5%), «Vostochnyı» (úlesi 14,8%), «Maıkóbe-Vest» (úlesi 3,9%) jáne «Qarajyra» (úlesi 7,3%) razrezderinde óndirýdiń ósýi baıqalyp otyr. Jalpy, barlyq óńirlerde kómirdiń qory qajetti mólsherde jınaqtalǵan. Temirjol kóligi parki kómirdi tasymaldaýdy tolyq qamtamasyz etip jatyr», - dedi mınıstr.
Onyń sózinshe, razrezderde kómir tolyq mólsherde bar, kómirdi óndirý josparly túrde júrgizilip jatyr, razrezderdegi kómirdiń baǵasy ótken jylǵy deńgeıde qalyp otyr.
