Kómirdi jasyryn sýbsıdııalaýdy qoıý qajet - Aıgúl Soloveva
«Búginde balamaly energııa kózderi qymbat degen mıf bar. Gaz da tıimsiz deıdi. Al kómir nege arzan? Sebebi bizde kómir salasyn jasyryn sýbsıdııalaý tetikteri bar. Máselen, kómirdi temirjolmen tasymaldaǵanǵa da sýbsıdııa bólip otyrady. Al ondaı qosalqy sýbsıdııalaý bolmasa, onyń baǵasy gazben birdeı bolady», - dedi A.Soloveva Astanada ótken baspasóz máslıxatynda.
Onyń oıynsha, qazirgi kezde balamaly energııa kózderi qymbat bolsa da, bolashaqta arzan, tipti tegin túsýi ábden múmkin.
«Máselen, Kalıfornııada ondaı energııa kózderi bir jyl boıy tegin boldy deıdi. Sondyqtan bizge osy baǵytta jumys isteı berý kerek. Sosyn búginde Dúnıejúzilik densaýlyq saqtaý uıymynyń standarttaryna tezdetip kóshý kerek. Oǵan sáıkes, aýanyń lastanýy adam densaýlyǵyna tıgizetin áserimen - pm2, pm01,pm10 dep belgilenedi. Osyny Ekologııalyq kodekske engizgen jón. Áıtpese, bizde bir tonnaǵa shaqqandaǵy mıllıgrammen ólshenedi. Negizi, ondaı qaldyqtardy adam densaýlyǵyna tıgizetin áserimen ólshegen durys», - dep atap kórsetti A.Soloveva.
Aıta keteıik, Qazaqstannyń ekologııalyq uıymdarynyń qaýymdastyǵy ekologııalyq problemalar kartasyn jasaýdy josparlap otyr. Uıym basshysynyń orynbasary Eldos Abaqanovtyń aıtýynsha, Qazaqstannyń Ekologııalyq kodeksinde qoǵamdyq baqylaý sharalary qarastyrylǵan. Alaıda búginde atalǵan sharalar atqarylmaıdy.
«Kodekstiń 15-bóliminde qoǵamdyq-ekologııalyq baqylaý quraly bar. Biraq bul jumys istemeı otyr. Sol sebepti biz qaýymdastyqtyń negizinde ekologııalyq baqylaý ınstıtýtyn qurǵymyz kelip otyr», - dedi E.Abaqanov.
