Kómirdi tasymaldaýǵa 9 myńǵa jýyq vagon bólindi - mınıstr Qasymbek
ASTANA. QazAqparat - Qazaqstan aımaqtaryna kómirdi jetkizý úshin 9 myńǵa jýyq vagon bólindi. Bul týraly QR Investıtsııalar jáne damý mınıstri Jeńis Qasymbek Feısbýktegi paraqshasynda jazdy, dep habarlaıdy QazAqparat tilshisi.
«Mınıstrlik basqa da memlekettik organdarmen jáne oblys ákimdikterimen birlesip, kommýnaldyq-turmystyq nysandar men halyqty kómirmen qamtamasyz etý máselesin turaqty baqylaýda ustap keledi. Bıyl ótken jylǵa qaraǵanda kómir óndirý kólemi artty. Sondaı-aq, óńirlerge kómir jetkizý máselesi de sheshilgen. Shuǵyl derekter boıynsha, búgingi kúni Qazaqstannyń kómir óndiretin kompanııalary jyl basynan beri túrli sorttaǵy 74,9 mln tonna kómir óndirgen. Bul 2017 jyldyń sáıkes kezeńimen salystyrǵanda 4,4 paıyzǵa (3,1 mln tonna) artyq», - dep jazdy mınıstr.
Onyń aıtýynsha, kómir óndirýshi kásiporyndardyń qoımalaryndaǵy qordy eseptegende jyl basynan beri 71,84 mln tonna kómir tıelip, jóneltilgen. Energetıkterge 40 mln tonnaǵa jýyq, al kommýnaldyq-turmystyq qajettilikter men halyqqa 7,5 mln tonna kómir jetkizilgen. Jylý berý maýsymyna daıyndyq bastalǵaly beri, naqty aıtqanda, 1 mamyr men 16 qyrkúıek aralyǵynda temirjol kóligimen 25,4 mln tonna kómir tasymaldandy. Bul ótken jylǵydan 1,3 mln tonaǵa nemese 5,6 paıyzǵa artyq.
«Búgingi tańda kómir tasymaldaýǵa 29 myń vagon jumyldyrylyp otyr. Sonyń ishinde kommýnaldyq-turmystyq kómir tasymaly úshin 9 myńǵa jýyq vagon bólingen. Bul túsken tapsyrys kólemin tasymaldaýdy tolyq qamatamasyz etedi. Jergilikti atqarýshy organdarmen birlese otyryp, kómirdi daıyndaý jáne ótkizý pýnktteriniń ınfraqurylymdyq jaǵdaıyna, jetkizý kestelerine, satylatyn kómirdiń baǵasy men sapasyna profılaktıkalyq baqylaý júrgizilýde. Atap aıtqanda, Aqmola oblysyna 640 tonna, Shyǵys Qazaqstan oblysyna 899 myń tonna, Qostanaı oblysyna 438,5 myń tonna, Soltústik Qazaqstan oblysyna 383 myń tonna, Astanaǵa 76,8 myń tonna kómir jetkizildi», - deıdi Jeńis Qasymbek.
