Kómirdi qymbatqa saýdalaǵan shymkenttikter 9 mln teńge aıyppul tóleıdi
ShYMKENT. QazAqparat - Ońtústik Qazaqstan oblysynda kómir baǵasyn qoldan qymbattatqandardyń isi sotqa ótti. Bul týraly «QazAqparat» tilshisine Básekelestikti jáne tutynýshylar quqyǵyn qorǵaý komıteti OQO departamenti basshysynyń orynbasary Baýyrjan Tashtanov aıtyp berdi.
Baýyrjan Tashtanovtyń sózine qaraǵanda, óńirde kómir satýmen aınalysatyn toǵyz kompanııa qatty otynnyń satylý baǵasyn negizsiz kótergen. Mundaı zańbuzýshylyqtar Tabıǵı monopolııalardy retteý, básekelestikti jáne tutynýshylar quqyǵyn qorǵaý komıteti óńirlik qyzmetkerleri júrgizgen tekserý barysynda anyqtalǵan. Belgili bolǵandaı, Shymkent pen Túrkistan qalasynda, Arys aýdanyndaǵy bazalarda kómir quny 10 - 13 myń teńgeniń aralyǵynda satylýy tıis bolǵan. Alaıda onyń satylý baǵasy tonnasyna 20 myń teńgege jýyqtapty.
«Óńirde kómir tapshylyǵy bolǵanda kásipkerler birden baǵany kótergen. Ózara kelisip, tonnasyn 13 myń teńgeden satýdyń ornyna 7 myń teńge qosyp 20 myń teńgege saýdalaǵan»,- deıdi Baýyrjan Tashtanov.
Osylaısha kásipkerler básekelestikke qarsy kelisimder boıynsha zańbuzýshylyqqa jol bergen. Endi osy áreketteri úshin baǵany negizsiz kótergenderge ákimshilik quqyqbuzýshylyq hattamalary toltyrylyp, 9 mln teńge kóleminde aıyppul salyndy. Tıisti qujattar mamandandyrylǵan ákimshilik sotqa joldandy.
