Kómirdi bólshek saýdada satýshylardyń monopolııaǵa qarsy komplaens aktilerin ázirleý júrgizilýde
«Básekelestikti qorǵaý salasyndaǵy zańnama normalarynyń buzylýyn aldyn alý maqsatynda kómirdi bólshek saýdada satýshylardyń monopolııaǵa qarsy komplaens aktilerin ázirleý boıynsha jumys júrgizilýde. Bul aktilerge sáıkes naryq sýbektileri naryqta adal básekelestikti júzege asyrýǵa jáne kommýnaldyq-turmystyq kómir baǵasynyń negizsiz kóterilýine jol bermeýge mindettenedi. Básekelestikti qorǵaý jáne damytý agenttigi qajet bolǵan jaǵdaıda monopolııaǵa qarsy den qoıý sharalaryn ýaqtyly qabyldaýǵa múmkindik beretin monıtorıngtik is-sharalardy apta saıynǵy negizde júrgizýde», - delingen Roman Sklıardiń Májilis depýttary saýalyna bergen jaýabynda.
Onyń atap ótýinshe, ýákiletti organ «Qarajyra» AQ, «Shubarkól Kómir» AQ jáne «Bogatyr Kómir» JShS kómir óndirýshi kompanııalardyń múddelerin bildiretin taý-ken óndirýshi jáne taý-ken metallýrgııalyq kásiporyndardyń respýblıkalyq qaýymdastyǵymen óńirlik kóterme satýshylarǵa jóneltý kezinde baǵanyń ósýin boldyrmaý týraly memorandýmdy jasasty.
«Sondaı-aq bul usynymdar negizinde ákimdikter óńirlik operatorlarǵa talaptar bóliginde usynystar ázirledi, olar qazirgi ýaqytta saýda-sattyqqa deldaldarsyz tikeleı qatysady jáne kómirdi túpkilikti tutynýshyǵa, ıaǵnı halyqqa satady. Jylytý maýsymynda baǵanyń negizsiz ósýine jol bermeý maqsatynda Básekelestikti qorǵaý jáne damytý agenttigi aýmaqtyq bólimsheleri apta saıyn temir jol bazalarynan (tuıyqtardan) satylatyn kómirdiń bosatý baǵalarynyń monıtorıngisin júzege asyrady»,- dedi Premer-Mınıstrdiń orynbasary.