Kómirden eshkim túbegeıli bas tarta almaıdy – mınıstr

NUR-SULTAN. QazAqparat – Kómirden eshkim túbegeıli bas tarta almaıdy. Bul týraly Prezıdent janyndaǵy Sheteldik ınvestorlar keńesiniń 34-shi jalpy otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Bizde kómir ónerkásibinde shamamen 30 myń adam jumys isteıdi. Kómirden bas tartý ońtaıly túrde júrgiziledi, ol birtindep júzege asyrylady. Óıtkeni, túbegeıli kóshe almaımyz. Tipti, álemde birde-bir el muny júzege asyra almaıdy», - dedi Álibek Qýantyrov.

Onyń aıtýynsha, Polshaǵa kómir paıdalanýǵa kvota berilgen. Biraq, bul el ýaqyty kelgende kómirdi paıdalaný kólemin birden qysqartýy tıis.

«Menińshe, Qazaqstan da shamamen osy jolmen júredi. Bizge kómirtegi beıtaraptyǵyna tolyǵymen kóshý úshin gaz nemese atom energııasy syndy balama kóshpeli kózderdi paıdalaný qajet. Munyń barlyǵy qazirgi ýaqytta talqylanyp jatyr. Búginde Ulttyq ekonomıka mınıstrligi halyqaralyq sarapshylarmen strategııa, doktrına ázirleý jumysyn júrgizýde. Menińshe, Osy syn-tegeýiriniń bári solarda eskeriletin bolady», - dedi mınıstr.