Kómir jetkizýdiń keshigý sebebi túsindirildi
«Bıyl 9 aıda kómirdi tıeý ótken jylmen salystyrǵanda 4% ósip, 76,6 mln tonnany qurady. Otandyq tutynýshylar úshin 53,5 mln tonna kómir tasymaldandy, bul ótken jyldyń 9 aıymen salystyrǵan 2% kóp. Onyń ishinde 47,4 mln tonna kómir JEO-larǵa jetkizilse, qalǵan 6,1 mln tonnasy turǵyndarǵa taratyldy», - dedi «Qazaqstan temir joly «Júk tasymaly» JShS bas dırektorynyń orynbasary Qanat Kóbesov «Samuryq-Qazyna» AQ alańynda onlaın ótken baspasóz máslıhatynda.
Sondaı-aq, QTJ ókili elimizdiń keıbir aımaqtaryna kómir jetkizýdiń keshigý sebebin atady.
«Aldymen kómirmen JEO men turǵyndar qajettiligi óteledi. Jospardan sál artta qalýymyzdyń sebebi, elimizdiń ońtústik óńirleri kómirdi jetkizýge endi ótinim bere bastaýymen baılanysty. Sol sebepten jospardan 10 paıyzǵa qalyp kelemiz. Óıtkeni, ońtústik óńirlerde salystyrmaly túrde aýa raıy áli de jyly. Al soltústik óńirler kommýnaldyq-turmystyq kómirmen tolyq qamtamasyz etilgen», - deıdi ol.
