Kómir tapshylyǵy máselesi eki kúnde sheshiledi - Almaty oblysynyń ákimdigi
ASTANA. QazAqparat - QR Energetıka mınıstrligi respýblıkanyń keı óńirlerinde oryn alǵan kómir tapshylyǵy jóninde, «Qazaqstan temir joly» AQ, kómir óndirýshi kompanııalar jáne memlekettik organdardyń qatysýymen respýblıkalyq jınalys ótkizdi, dep habarlaıdy QazAqparat tilshisi.
Jınalysta oblystyq ákimdikter beınekonferentsııa arqyly QR Energetıka vıtse-mınıstri Baqytjan Jaqsalıevke óńirdegi kómir jetkizý jaǵdaıy jóninde esep berdi.
Almaty oblysy Energetıka jáne turǵyn úı-kommýnaldyq sharýashylyq basqarmasynyń basshysy Áset Qanaǵatovtyń aıtýynsha, aımaqtaǵy kommýnaldyq-turmystyq kómirdi jetkizýshiler men satýshylar aýa raıy jaǵdaıyna daıyn bolmaǵan jáne kúrt ósken suranysty der kezinde qanaǵattandyra almaǵan.
«Aýa temperatýrasynyń kúrt tómendeýinen 20-24 qańtar kúnderi kómir óndirý kólemi azaıdy, osyǵan baılanysty otyndy jetkizý kestesi de saqtalmady. 25 qańtardan beri kómir razrezderindegi jumys kestege sáıkes júrgizilýde. Ázirge kómirdi jetkizý máselesi turaqtalmady», - dedi Áset Qanaǵatov.
Basqarma basshysy atalǵan máseleniń baqylaýǵa alynǵanyn, shtab qurylyp, árbir vagonnyń baǵyty qadaǵalanyp otyrǵanyn jetkizdi.
Sońǵy úsh kúnde Almaty jáne Taldyqorǵan óńirlerine Qarajyra jáne Shubarkól razrezderinen 246 vagon nemese 16 myń tonna kómir jiberilgen. Onyń 10 myń tonnasy Esik qalasy ornalasqan Almaty óńirine jiberilgen.
«Taldyqorǵan óńirinde 92 vagon kómir bar, taǵy 54 vagon kómir túsirý josparlanyp otyr. Taldyqorǵan qalasynda 16 vagon kómir túsirilip jatyr. Meniń oıymsha, eki-úsh kunde turmystyq kómirge degen suranysty jabamyz», - dep óz sózin tolyqtyrdy Á. Qanaǵatov.
Ákimdik ókiliniń aıtýynsha, jylytý maýsymynda tutas oblysqa 1 mıllıon 430 myń tonna kómir qajet. Búginde 1 mıllıon 308 myń tonnasy, ıaǵnı 93 protsenti ázirlengen. Qazirgi ýaqytta 29 myń 640 tonna kómir bar, onyń bir tonnasy 14,5-15 myń teńgeni quraıdy.
Aıta keteıik, aýa temperatýrasynyń tómendeýine baılanysty sońǵy aptada respýblıkanyń ońtústiginde, ásirese Almaty oblysynda kómirge degen suranys kúrt ósti.
Sonyń saldarynan Taldyqorǵanda bir tonna kómir baǵasy 20 myń teńgege deıin qymbattady.
