Kómir tapshylyǵy: Almaty oblysynyń jańa ákimi basqarma basshysyna sógis berdi

TALDYQORǴAN. QazAqparat - Halyqty kómirmen qamtamasyz etýdi nashar uıymdastyrǵany jáne qanaǵattanarlyqsyz jumysy úshin Almaty oblystyq energetıka jáne turǵyn úı kommýnaldyq sharýashylyǵy basqarmasynyń basshysy Baǵlan Tánekenovke sógis berildi, - dep habarlaıdy QazAqparat tilshisi.

Almaty oblysy ákiminiń birinshi orynbasary Lazzat Turlashov pen aýdan, qala ákimderine eskertý jasalyp, 15 kúnniń ishinde jaǵdaıdy túzetý tapsyryldy. Eger tapsyrma oryndalmasa, olarǵa qatań shara qoldanylatynyn oblys ákimi Qanat Bozymbaev eskertti.

Aıta keteıik, Almaty oblysynda kómirge qatysty jıyn ótkizgen Qanat Bozymbaev jaýaptylardyń jumysyn nashar dep baǵalady.

«Jylytý maýsymy bastalǵaly oblysymyzǵa qajetti qatty otyn kólemi áli tolyq jetkizilgen joq. «Qarajyra» ken ornynan ákelingen kómir kólemi 300 myń tonnaǵa jýyq nemese 54% ǵana qurap otyr, bul óz kezeginde halyqtyń kóptegen narazylyǵyn týdyrýda. Osyǵan baılanysty qazirgi jıynda jylytý maýsymynyń ótý barysyn qarastyramyz», - dedi Q.Bozymbaev.

Kómir baǵasynyń qansha ekenin suraǵan Qanat Aldabergenuly basqarma basshysynyń «Kómir baǵasy 14-16 myń teńge kóleminde» degen jaýabyna kóńili tolǵan joq.

«Mendegi málimet basqa. Men kómirdiń kóterme baǵasyn emes, turǵyndarǵa satylatyn baǵasyn surap otyrmyn. Halyq qazir kómirdi 23-30 myń teńge arasyndaǵy somaǵa satyp alyp otyr. Nege bulaı? Eń aldymen kómir jetispeýshiligin boldyrmaý kerek. Ekinshiden, baǵanyń kóterilýine jol bermeý kerek. Eger kómir jetpeı jatsa, baǵany qalaı ustap tura alasyzdar? Jumystaryńyz nashar», - dedi Q.Bozymbaev.

Jıyn barysynda oblys ákimi Qanat Bozymbaev qysqy otynmen jetkilikti kólemde qamtý, temir jol arqyly tasymaldaý máseleleri boıynsha tıisti aktsıonerlik qoǵamdardyń basshylarymen sóıleskenin, olardyń barlyǵy oblysqa qajetti qoldaý kórsetetinin aıtty.

«Halyqty kómirmen qamtý sharalary ýaqytyly qabyldanyp, baǵalardyń ósýine jol berilmeýin qatań tapsyramyn. Halyqtyń áleýmettik jaǵynan qorǵalatyn osal toptaryna kómirdi kommýnaldyq avtokóliktermen jetkizip berý uıymdastyrylsyn. Ár aýdan, qalada kómir tasymaldaýmen kimder aınalysady, qandaı kólikpen tasıdy, bárin bilip otyrsyzdar. Sondyqtan olardy shaqyryp, tıisti kalkýlıatsııa jasap, kelisim negizinde shekti baǵany qoıý kerek. Oǵan kónbeı me, kómir tuıyqtaryna jibermeńizder. Baǵany baqylańyzdar. Kómir jetispeýshiliginen halyq zardap shekpeýi kerek!» - dedi Qanat Bozymbaev.