Kómir satý kezeńinde alypsatarlyqtyń aldyn alý jospary ázirlendi
Kenshiler ólkesinde qatty otyn satylatyn 52 oryn belgilengen. Olardyń 20-sy Qaraǵandyda ornalasqan. Mamandardyń baǵalaýy boıynsha óńirdi tolyǵymen qamtamasyz etý úshin kómir qory jetkilikti.
Alaıda kómir tapshylyǵy men júk kóligi júrgizýshileri arasynda daýly jaǵdaılarǵa jol bermes úshin Indýstrııalyq damý komıtetiniń basshylyǵy deldaldar sanyn azaıtý jónindegi sharalar josparyn ázirledi.
«Qaraǵandy oblysynyń kómirge degen qajettiligi – 1 mln 156 myń tonna. Mınıstrlik júıeli sharalardy qabyldap jatyr. Birinshiden, respýblıka deńgeıinde tıisti is-sharalar jospary ázirlenip, bul jóninde barlyq ákimdikke jetkizildi. Ekinshiden, kómirdi avtokólikpen respýblıka aýmaǵynan áketýge tolyq tyıym salyndy. Bul sheshimniń negizgi maqsaty – alypsatarlar sanyn azaıtý jáne boldyrmaý»,dedi QR IIDM Indýstrııalyq damý komıtetiniń tóraǵasy Azamat Panbaev.
Sonymen qatar mamandar halyqqa arnalǵan kómir satylatyn 9 jaqyn pýnktti aıqyndap berdi. Al oblystaǵy Barshıno aýylynda qurǵaq qoımany daıyndap qoıý kózdelip otyr. Osy oraıda óńir azamattaryna kómirdi satý kezeńinde dúrbeleń bolý múmkin ekenin eskergen jón.
Budan bólek qosymsha 4 otyn bazasyn qurý týraly sheshim qabyldandy: Ulytaý oblysynda 2, Qostanaı oblysynda 1, Qaraǵandy oblysynyń Osakarovka kentinde 1 satý pýnkti. Atalǵan pýnktterge kómir temirjol kóligimen úzdiksiz jetkiziletin bolady.
Qatty otynnyń baǵasy, jetkizý sharttary jáne satý oryndary týraly tolyq aqparatty Qaraǵandy qalasynyń kásipkerlik jáne aýyl sharýashylyǵy bóliminen (8-7212) 42-15-05 nómiri boıynsha alýǵa bolady. «Shubarkól kómir» AQ jedel jelisi: +7-702-784-92-22, +7-701-723-53-62.
Aıta ketý kerek, ishki naryqta kómir tapshylyǵyn boldyrmaý maqsatynda bıyl 26 mamyrdan bastap IIDM Qazaqstan aýmaǵynan kómirdi avtokólikpen áketýge 6 aıǵa shekteý qoıdy. Qarasha aıynda buıryq taǵy 6 aıǵa, ıaǵnı 2024 jyldyń 26 mamyryna deıin uzartylady.
Buǵan qosa QR aýmaǵynan lıtsenzııasy bar kómir óndirýshi kásiporyndarǵa temirjol kóligimen tas jáne qońyr kómirdi eksporttaýǵa aıryqsha quqyq berýdi kózdeıtin qaýlynyń jobasy ázirlendi. Onyń jobasy vedomstvoaralyq komıssııanyń otyrysynda qaraý úshin QR Saýda jáne ıntegratsııa mınıstrligine jiberildi. Tıisti nátıje alynǵan soń atalǵan qujat memlekettik organdarǵa joldanyp, sondaı-aq Úkimetke tıisti tártippen bekitý úshin jiberiledi.
