Kómir máselesi qatań baqylaýda - Jeńis Qasymbek
ASTANA. QazAqparat - Aǵymdaǵy jyly kómir tapshylyǵy bolmaıdy. Bul týraly búgin Úkimettiń selektorlyq rejimdegi otyrysynan keıin QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.
«Keshe ǵana Úkimette selektorlyq jıyn ótkizdik. Biz búkil óńirlerdegi energetıkalyq jáne halyqqa arnalǵan kómirdi qatań baqylaýda ustap otyrmyz. Qazirgi ýaqytta baǵa turaqty, óndirilgen kómir kólemi byltyrǵydan kóp, vagondar da jetkilikti», -dedi mınıstr.
Osy rette ol ótken aptada elordada kómir tapshylyǵy oryn aldy degen aqparattyń taraǵandyǵyna toqtaldy.
«Ótken aptada Astanada taraǵan aqparat teris bolyp shyqty. Qoımalardy kómir joq degen áńgime bolǵan. Keshe elorda ákiminiń orynbasary kómirdiń josparlanǵan shekte jetkilikti ekendigin resmı qýattady. Problema joq. Biz barlyǵymen, Shubarkól, Qarajyra jáne ózge de jer qoınaýyn paıdalanýshylarmen tyǵyz jumys istep jatyrmyz. Bul máseleni kúndelikti baqylaýda ustap otyrmyz. Qajet bolsa, kúndelikti óndirilgen, tasymaldanǵan, daıyndalǵan kómir kólemi týraly aqparatty bere alamyz», - dedi ol.
Jeńis Qasymbek kómir baǵasy óńirlerde tonnasyna 14-18 myń teńgege satylyp jatqanyn, al Almatyda 30 myńǵa jetti degen aqparattyń shyndyqqa janaspaıtyndyǵyn da atap ótti.
