Kómir baǵasynyń negizsiz ósýine tosqaýyldar qoıylady
ASTANA. QazAqparat - Arnaıy qurylǵan shtab qolma qol rejimde kómir baǵasyna qatysty ahýaldy rettep otyrady. Bul týraly «Úkimet úıinde» ótken baspasóz máslıhatynda QR Investıtsııalar jáne damý vıtse-mınıstri Roman Sklıar málim etti, dep habarlaıdy QazAqparat.
«Jyl basynan beri 60 mln tonna kómir óndirilip, bul kórsetkish byltyrǵa qaraǵanda 103,9 paıyzdy qurady. Elektr energııasy stansalaryna 32,5 mln tonna, kommýnaldyq-turmystyq qajettilikter men turǵyndarǵa 5,5 mln tonna tıeldi, sondaı-aq 15 mln tonnasy eksportqa baǵyttaldy. Jylý berý maýsymyndaǵy jumystardyń turaqtylyǵyn qamtamasyz etý turǵysynda bıylǵy 7 tamyzdaǵy Úkimet basshysynyń tapsyrmasymen, sonymen qatar Energetıka, Investıtsııalar jáne damý mınıstrlikteriniń birlesken buıryqtarymen tıisti shtab quryldy. Shtab óz kezeginde bıylǵy jylý berý maýsymynyń barysyna monıtorıng júrgizedi. Shtab quramyna memorgandar, ulttyq kompanııalar men óndirýshi kompanııalardyń ókilderi endi», - dedi R. Sklıar.
Onyń sózine qaraǵanda, Energetıka mınıstrligi kún saıyn kúz ári qys kezeńderine monıtorıng júrgizip, elektr stansalarynda kómir qorynyń jınalýyn nazarda ustaıdy. Al QR IDM apta saıynǵy negizde kómirdi óndirý men tasymaldaý sharalaryna monıtorıng jasaıdy.
Kómir baǵasynyń qalyptasýy taqyrybyna toqtalǵan R. Sklıar, bul másele ákimdikterdiń, Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń, IDM baqylaýynda bolatynyn jetkizdi.
Budan buryn habarlanǵandaı, kómir baǵasy deldaldar arqyly jasandy túrde kóteriletini aıtylǵan edi.
Sonymen qatar Energetıka mınıstrligi ShQO-da kómirdiń qymbattaýyna qatysty da jaýap berdi.
