Kómir baǵasynda tym asyra alshaqtyq bolmaıdy - QR IDM
ASTANA. QazAqparat - QR Investıtsııalar jáne damý mınıstrligi elimizdiń birqatar óńirinde kómir baǵasynyń negizsiz ósýine qatysty pikir bildirdi, dep habarlaıdy QazAqparat tilshisi.
«Qazirgi ýaqytta Tabıǵı monopolııalardy retteý agenttigimen birge bul máselemen aınalysyp jatyrmyz. Árbir ákimdiktiń aldyna bul másele qoıylǵan. Tipti, Bas prokýratýra da aralasyp otyr. Menińshe, endigi ýaqytta baǵada tym asyra alshaqtyq bolmaıdy», - dedi QR IDM Indýstrııalyq damý jáne ónerkásiptik qaýipsizdik komıteti tóraǵasynyń orynbasary Qanat Baıytov.
Osy rette ol Shyǵys Qazaqstannyń oblys ortalyǵynda kómirdiń bir tonnasy 8 myń, al aýdandarda 18 myń teńge degen aqparatqa qatysty mán-jaıdyń basyn ashyp berdi.
«Keshe jıyn bolǵan kezde Shyǵys Qazaqstan oblysynyń ákimdigi munyń teris aqparat ekendigin, mundaı baǵa bolmaǵanyn aıtty. Bireý bireýge baǵa ósip ketti dep aıtqan sııaqty. Biraq, Shyǵys Qazaqstan oblysynda dál mundaı baǵa bolǵan emes», - dedi ol.
Sonymen qatar Qanat Baıytov tamyz aıynda qajetti kómirdiń 70 paıyzdan astamy dittegen jerine jetkizilgenin aıtty.
