Kómir baǵasyn qoldan ósirýshilermen kim kúresedi

NUR-SULTAN. QazAqparat – Kómir baǵasyn qoldan ósirýshilerge bıyl qandaı tosqaýyl qoıylady? Nur-Sultan qalasynyń ákimdiginde ótken brıfıngte BAQ ókilderi tarapynan osyndaı saýal qoıyldy, dep habarlaıdy QazAqparat tilshisi.

Byltyrǵy maýsymda elordany jylytýǵa 420 myń tonna kómir ketken. Nur-Sultan qalasynyń otyn-energetıkalyq kesheni jáne kommýnaldyq sharýashylyq basqarmasynyń basshysy Erbol Tóleýov onyń 20 paıyzyn qalaǵa jaqyn jatqan Qaraǵandy jáne Aqmola oblysynyń eldi mekenderi tutynǵanyn málim etti.

«Biz jyl saıyn kómirdi erterek satyp alý kerektigin aıtamyz. Biraq jylytý maýsymyna daıyndyq mektepke daıyndyqpen qabattasyp keledi. Sondyqtan, turǵyndardyń kóbi balalaryn oqý jylyna daıyndaýmen áýre bolyp jatady. Bul jylda qaıtalanatyn qubylys. Kómir satyp alý qyrkúıek aıynan keıin ǵana qyzady. Muny jetkizýshiler de bilip alǵan. Ol kezde ken oryndarynan kómir kóptep ákelinedi», - deıdi ákimdik ókili.

Erbol Tóleýov kómir baǵasy alyp-satarlyqtyń kesirinen qubylatynyn moıyndady.

«Ókinishke oraı, ondaı másele bar. Onyń týyndaǵanyna biraz ýaqyt boldy. Alyp-satarlarmen kúres qalalyq ishki ister departamentine júktelgen. Óıtkeni, biz alyp-satýmen aınalysatyndardy baqylaı almaımyz. Biz iri satýshylardy ǵana baqylap otyrmyz. Óz kóligimen satyp alyp, qalanyń shetine baryp kómirdiń bir tonnasyn 18 myńnan satyp júrgender bar. Bul is ishki ister departamentine júktelgen. Sondaı-aq, qalanyń aýdandyq ákimdikteri retteýge mindetti», - dedi ol.

Basqarma basshysynyń aıtýynsha, áleýmettiń álsiz toptaryna jylytý maýsymyna kómek retinde 20200 teńge kóleminde bir rettik ótemaqy berilmek.

«Ótemaqy somasy – 20200 teńge. Bul soma jylytý maýsymynda bir ret tólenedi. Atalmysh kómekke ótinim berý úshin Nur-Sultan qalasynyń jumyspen qamtý jáne áleýmettik baǵdarlamalar basqarmasyna júginý qajet. Ondaı kómektiń kimge beriletinin, kimge qarastyrylmaǵanyn da sol jerden bilý qajet», - dedi ol.