Kómir baǵasy qymbattamaıdy - Almaty ákimdigi
ALMATY. QazAqparat - Almaty qalalyq kásipkerlik pen ındýstrııalyq-ınnovatsııalyq damý basqarmasynyń mamandary kómir baǵasynyń qymbattamaıtynyn aıtyp sendirdi, dep habarlaıdy QazAqparat tilshisi.
Qazir qaladaǵy kómir qory 120 myń tonna dep baǵalanyp otyr. Basqarma mamandarynyń aıtýynsha, bul jyldyq tutyný kórsetkishinen eki ese artyq. Búginde kómir 9 bazada satylyp jatyr. Bir tonnany 12-16 myń teńgege satyp alýǵa bolady. Túrksib aýdanyndaǵy bazaǵa búgin 3 vagon - 210 tonna kómir jetkizildi.
Almaty turǵyndary arasynda kómirge suranys óte joǵary. Otyn kóp jatpaıdy, tez satylyp ketedi. Óıtkeni, qalada 5 myń jekemenshik úıge kógildir otyn kirgizilmegen. Basqarmanyń málimetinshe, onyń 85%-y kómirmen qamtylyp úlgerdi.
Almatylyqtar jylytý maýsymynda orta eseppen 50 myń tonna kómir jaǵady.
«Ótken jylmen salystyrǵanda bıyl 100 myń tonnanyń 70 myńy qaladaǵy bazalarǵa jetkizilip úlgerdi. Qazan-qarasha aılarynda taǵy 40 myń tonna kómir jetkiziledi. Kómir baǵasy ózgermeıdi, sebebi biz kómir bazalarymen kelisimge otyrǵanbyz», - dedi qalalyq kásipkerlik jáne ındýstrııalyq-ınnovatsııalyq damý basqarmasynyń bólim basshysy Erlan Omarov.
