Komıks avtorlary elordada ótetin Ortalyq Azııa festıvalinde bas qosady
Komıks jankúıerleri men kınosúıerlerdiń, beıne-oıyndar men mýltfılmge áýes jandardyń arasynda keńinen tanymal Comic Con festıvali óz bastaýyn AQSh-tan alady.
Álemniń ár túkpirinde ótip turatyn bul fastıval komıks avtorlary men jankúıerleriniń dástúrli basqosýyna aınalyp úlgergen. Osyndaı basqosýdy Nur-Sultan qalasynyń ákimdigine qarasty «Astana Convention Bureau» JShS Balalardyń quqyqtaryn qorǵaý kúnine oraı ótkizbekshi. Oǵan elimizdiń ózge óńirlerinen, alys jáne jaqyn shetelderden 70 myń qonaq qatysady dep josparlanýda.
Festıvaldiń ár qıly ári mazmundy baǵdarlamasynda arnaıy kórsetilimder men kostıýmdik oıyndar, halyqaralyq stýdııalar men kompanııalardyń tanystyrylymdary bar. Shara qonaqtary komıks álemindegi bıylǵy jyldyń negizgi premeralaryn tamashalap, sýper qaharmandardyń obrazyna enip, súıikti ártisterimen sýretke túsetin bolady.
Astanada ótetin festıvalge qatysýǵa Disney, Marvel, World of Tanks oıynymen tanymal Wargaming, Turner (Cartoon Network), HBO (Home Box Office Int., Warner Bros. Entertaiment) sııaqty álemdik brendter nıet tanytyp otyr.
Sharany uıymdastyrýshylar konkýrs nátıjesi boıynsha avtorlarǵa óz jumystaryn festıval alańynda aqysyz negizde kórsetýge múmkindik bermek.
«Festıvalge Qazaqstannyń kez kelgen túkpirinde turatyn shyǵarmashyl adamdar men ujymdardy shaqyramyz. Illıýstrator-sýretshiler, stsenarıster men komıks avtorlary, baspalar men kospleıge áýes adamdardyń barlyǵy festıval alańynda óz ónimderin pash ete alady. Ol úshin portfolıo men mýltkeńistikte somdalatyn obraz týraly ilespe hat jiberse jetkilikti» - deıdi «Astana Convention Bureau» JShS-niń qarasty Astana Events departamentiniń bas menedjeri Beksultan Ábdrahmenov.
Festıval Nur-Sultan qalasynyń Kongress ortalyǵynda ótedi.
