Kómekke muqtaj astanalyqtar tegin kómir jáne ýly gaz datchıgimen qamtyldy

NUR-SULTAN. QazAqparat – Nur-Sultan qalasynda qaıyrymdylyq sharasy aıasynda áleýmettik osal topqa jatatyn otbasylarǵa tegin kómir jetkizilip, úılerine ýly gazdan saqtaıtyn datchıkter ornatyldy. Bul týraly Nur-Sultan qalasy tótenshe jaǵdaılar departamenti Memlekettik órt baqylaý basqarmasynyń basshysy Erkin Otarǵalymuly málim etti, dep habarlaıdy QazAqparat tilshisi.

«Tótenshe jaǵdaılardyń aldyn alý maqsatynda jeke sektorda ýly gaz datchıkterin ornatý jumysy keń aýqymda júrdi. Osy ýaqytqa deıin barlyǵy 66 datchık ornatyldy. Órt qaýipsizdigin qamtamasyz etýdi tekserý barysynda jylytý, elektr jelileri men jabdyqtaryn, aýla aýmaǵyn paıdalaný kezinde 26 487 qaǵıda buzýshylyq anyqtalyp, ony joıý usynyldy. Sondaı-aq, elordada áleýmettik osal topqa jatatyn otbasylar turatyn 1 429 jeke turǵyn úı esepke alyndy», - dedi Erkin Otarǵalymuly elorda ákimdiginde onlaın ótken baspasóz máslıhatynda.

Sondaı-aq, TJD-niń ókili elordada az qamtylǵan otbasylarǵa kómek kórsetilgenin aıtty.

«Halyqtyń áleýmettik osal toptaryna jergilikti atqarýshy organdar jáne «Dauletten» qaıyrymdylyq qorynyń qatysýymen órt qaýipsizdigin qamtamasyz etý máselelerine 1 mln teńgeden astam qarajat jınaldy. Jınalǵan qaıyrymdylyq qarajatqa 10 otbasynda peshpen jylytý qalpyna keltirildi jáne muqtaj jandarǵa 2,5 tonna kómir jetkizildi. Odan bólek, 88 ýly gaz datchıkteri satyp alyndy. Jáne jalǵyz basty zeınetkerler men múgedekterdiń peshterine jóndeý júrgizý arqyly tútin arnalaryn tazalaý jumysy júrgizildi», - deıdi ol.