Kómek suraýdan qoryqpańyzdar: ІІM balalarǵa úndeý jasady

ASTANA. KAZINFORM – Іshki ister mınıstrligi ata-analar men balalarǵa úndeý jasady, dep habarlaıdy Polisia.kz.

 — Qurmetti qazaqstandyqtar! Ata-analar men balalar!

Balalyq shaqty qorǵaý — memlekettik saıasattyń basym baǵyty. Balalar — bizdiń tiregimiz, eldiń bolashaǵy. Olardyń qaýipsizdigi — qoǵamnyń ortaq jaýapkershiligi jáne de Іshki ister mınıstrliginiń basty mindeti. Bul baǵytta naqty sharalar qabyldanýda.

ıÝvenaldy polıtsııanyń jumysy kúsheıtildi. Patrýl narıadtary bilim uıymdaryna jaqyn qoıyldy. Ákimdiktermen birlesip, mektep mańyndaǵy jol ınfraqurylymyn jaqsartýdamyz. Zańnama jańa talaptarǵa saı pysyqtalýda. Kámeletke tolmaǵandarǵa qatysty qylmystar úshin jaýaptylyq kúsheıdi. Býllıng pen qýdalaýǵa qarsy quqyqtyq sharalar engizildi. Senim telefondary arqyly balalar men ata-analar kez kelgen ýaqytta kómek ala alady.

Búginde kóptegen jasóspirim qoǵamǵa qyzmet etý jolyn tańdaýda. Mektepterde «Jas saqshy» polıtsııa synyptary ashylyp jatyr. Onda balalar jastaıynan zańdy meńgerip, jaýapkershilikke úırenýde. Birqatary erikti túrde jobalarǵa qatysyp, tártiptiń saqtalýyna úles qosýda. Bul — naǵyz patrıotızmniń belgisi. Biz olardy maqtan tutamyz.

Degenmen de ata-ananyń qamqorlyǵy men ustazdyń qoldaýyn eshteńe almastyra almaıdy.

Otbasy men mektep — balanyń alǵashqy altyn uıasy. Sondyqtan ata-analar men ustazdardyń balalarǵa árdaıym jaqyn bolyp, kóńil bólýi mańyzdy.

Al, balalar, sizderge aıtarym — kómek suraýdan qoryqpańyzdar! Polıtsııa — sizderdiń qorǵandaryńyz! Biz sizder qaýipsiz ortada ómir súrý úshin qyzmet etemiz. Balalyq shaqtaryńyz qýanyshqa, al bolashaqtaryńyz jarqyn sátter men múmkindikterge toly bolsyn! — dedi ІІM ákimshilik polıtsııa komıtetiniń tóraǵasy Qaısar Sultanbaev.

Aıta keteıik, Bıyl balalar men jasóspirimder qozǵalysyn damytýdyń jańa tásilderi qabyldanady.