Kómek shyn muqtaj azamattarǵa ǵana kórsetilýi kerek - Memleket basshysy
BÝRABAI. KAZINFORM – Prezıdent Qasym-Jomart Toqaev Ulttyq quryltaıdyń IV otyrysynda Úkimetke jyl aıaǵyna deıin áleýmettik sıpattaǵy shyǵyndardy ońtaılandyrýdy tapsyrdy.
- Bizdiń elimiz – áleýmettik memleket. Sondyqtan bilim berý, densaýlyq saqtaý salalaryna ınvestıtsııa salýdy jalǵastyramyz. Bul – bizdiń konstıtýtsııalyq mindetimiz. Biraq shyn muqtaj azamattarǵa ǵana kómek kórsetilýi kerek. Qyzmetin asyra paıdalanýǵa, alaıaqtyqqa jol berilmeıdi. Sondyqtan basymdyq berilmegen jobalarǵa bólinetin qarjy azaıady. Bul qajet shara ekeni aıdan anyq. Úkimet osy jyldyń sońyna deıin ony qalaı ońtaılandyrý kerektigin birjola anyqtap alýǵa tıis, - dedi Prezıdent.
Qasym-Jomart Toqaev Úkimet usynǵan salyq reformasyna da toqtaldy.
- Bul sharalar, jalpy alǵanda, durys. Onda negizgi ekonomıkalyq jáne áleýmettik faktorlar eskerilgen. Kásibı mamandar da, jalpy jurtshylyq ta qosymsha qun salyǵynyń mólsherlemesin kóterý qajettigine túsinistikpen qaraıdy. Degenmen usynylǵan sharalarǵa, sonyń ishinde, qosymsha qun salyǵyna qatysty syn-pikirler de estilip qalady. Biraq mundaı paıym shynaıy ahýalǵa negizdelmegen. Túrli sebepke baılanysty ózine aýqymdy áleýmettik mindetteme almaıtyn elder az emes. Al Qazaqstannyń bıýdjet qarjysynyń jartysynan kóbi áleýmettik salanyń enshisinde, - dedi Memleket basshysy.
Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.
Buǵan deıin Mádenıet jáne aqparat mınıstri Aıda Balaeva jıynnyń alǵashqy kúninde aıtylǵan usynystar týraly málimet bergen edi.
Al Ǵylym jáne joǵary bilim mınıstri Saıasat Nurbek Ulttyq quryltaıdyń 4-otyrysy aıasynda Qazaqstan tarıhynyń jańa akademııalyq basylymyn ázirlenetinin aıtty.
2022 jyly Ulttyq quryltaı alǵash jandanǵannan beri eldegi áleýmettik-ekonomıkalyq máseleler sheshim taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy.