Komandalyq kóshýge tyıym salynady - Parlament
ASTANA. QazAqparat - Bolashaqta jańa jumysqa aýysatyn mınıstr ózimen birge tek kómekshisi men baspasóz hatshysyn ǵana alyp bara alady. 7 qazanda Májilis depýtattary ekinshi oqylymda maquldaǵan «Qazaqstan Respýblıkasynyń memlekettik qyzmeti týraly» zań jobasynda (ilespe zań jobasy da bar) osyndaı jańa norma engizilgen.
«Bul zań jobasy memlekettik organdardyń jáne quqyq qorǵaý organdarynyń qyzmetkerlerine qatysty bolady. Atap aıtqanda, quqyq qorǵaý organyna alǵash ret jumysqa qabyldanatyndar Memlekettik qyzmet isteri jáne sybaılas jemqorlyqqa qarsy is-qımyl agenttiginiń quqyq qorǵaý organdarymen birlesip daıyndaıtyn testisinen ótedi»,-dep túsindirdi ózgeristerdi Májilis depýtaty Ersultan Bekturǵanov.
Budan bólek, memlekettik qyzmetke qabyldanatyndar úsh satylyq irikteýden ótedi. Olar jumysty áýeli eń tómengi laýazymnan bastaıdy, al odan ári joǵarylaýy úshin belgili bir quzyrettilik, tómengi laýazymda jumys ótiliniń bolýy, sondaı-aq turaqty túrde biliktiligin arttyrýy talap etiledi. - Jalpy jańadan usynylyp otyrǵan mansaptyq (karerlik) modelge kóshýimiz memlekettik qyzmettiń deńgeıin jańa bir satyǵa kóteretini sózsiz,- dedi E. Bekturǵanov. Jańa zańǵa sáıkes, memlekettik organdardaǵy bosaǵan laýazymdarǵa, sonyń ishinde joǵary qyzmetke, birinshi kezekte sol organdaǵy qyzmetkerlerdiń kirý múmkindiginiń bolýy, ártúrli joldarmen joǵary laýazymǵa keletinderge tosqaýyl bola otyryp, kópten beri synalyp júrgen, talapty, talantty azamattardyń bolashaǵyna senimmen qarap, qyzmettik ósýine jol ashady.
Ersultan Bekturǵanovtyń pikirinshe, úsh satyly irikteý júıesinen turatyn merıtokratııa qaǵıdattaryna negizdelgen qyzmettik joǵarylaý júıesi memlekettik qyzmettiń sapasyn odan saıyn arttyra túsedi. Osyǵan oraı Ersultan Bekturǵanov: «Bul ózgeris kópti mazalaıtyn laýazymdy basshylar aýysqan kezde apparattarda bolatyn aýys-túıisti azaıtyp, turaqsyzdyqqa jol bermeıdi dep sanaımyz»,-degen oıyn aıtty. Sondaı-aq, zań jobasynda Qazaqstan Respýblıkasynyń memlekettik qyzmet isteri jónindegi ýákiletti organynyń quzyreti aıqyndalǵan. «B» korpýsynyń ákimshilik memlekettik laýazymdaryna azamattardy irikteýdiń jańa júıesi engizilgen. Ákimshilik memlekettik qyzmetshilerdiń rotatsııasy men attestatsııasynyń tártibi, sheteldik azamattardy memlekettik organdarǵa jumysqa alýǵa qoıylatyn talaptar da naqty kórsetilgen.
Basqarý júıesindegi azamattardyń tájirıbesin tıimdi paıdalaný úshin «A» korpýsy sııaqty, «B» korpýsynyń da basshylyq laýazymdary arasynda rotatsııa júrgiziledi. Atap aıtarlyǵy, bilikti mamandardy jumysqa qabyldaýǵa tikeleı áser etetin eńbekaqy tóleý máselesi de jańadan sheshimin tapqan. Mysaly, jalaqy deńgeıi qyzmetkerdiń atqaratyn jumysynyń sıpatyna, kólemine jáne nátıjesine baılanysty tólenedi. Sondaı-aq, materıaldyq kómekpen qatar buryn-sońdy memlekettik qyzmette bolmaǵan bonýstyq tólem berý ádisi engiziledi. Aıta keterligi, «B» korpýsynyń ákimshilik memlekettik laýazymyn ıelenýge úmitkerler jalpy jáne ishki konkýrstyq irikteýden ótedi. Zańǵa sáıkes, «B» korpýsyndaǵy memlekettik qyzmetkerdi konkýrssyz aýystyrý rásimi tek mınıstrdiń kómekshisi men baspasóz hatshysyna ǵana saqtalady.
