«Komandalyq «kóshi-qon» joıyla ma?» - BAQ-qa sholý
***
«Osyndaı bir alqaly jıyn ótkizýdiń tolǵaǵy kópten jetip, tolǵandyrǵan máselelerdiń qordalanyp qalǵandyǵy da belgili bolǵandaı edi. Elbasy tóraǵalyǵymen ótip, ońtústik óńirdiń kókeıkesti máselelerin keńinen qozǵap, qamtylǵan oblystar aldyna óreli mindetter qoıǵan keleli keńeske Prezıdent Ákimshiliginiń Basshysy Kárim Másimov, Premer-Mınıstrdiń birinshi orynbasary - Óńirlik damý mınıstri Baqytjan Saǵyntaev, Prezıdent Ákimshiligi Basshysynyń orynbasary Ǵabıdolla Ábdirahymov, Almaty qalasynyń ákimi Ahmetjan Esimov, Almaty oblysynyń ákimi Ańsar Musahanov, Jambyl oblysynyń ákimi Qanat Bozymbaev, Qyzylorda oblysynyń ákimi Qyrymbek Kósherbaev, Ońtústik Qazaqstan oblysynyń ákimi Asqar Myrzahmetov qatysty», - dep jazady «Egemen Qazaqstan» gazeti búgingi sanyndaǵy «Ońtústik óńirler aldynda orasan mindetter tur» degen taqyryptaǵy maqalasynda. Basylymnyń atap ótýinshe, Elbasy naýryzdan bastap memlekettik qyzmettiń jańa úlgisi engizilgenin, osyǵan baılanysty barlyq qajetti Jarlyqqa qol qoıylǵanyn atap ótken. «Birinshi shildege deıin basqarýshylardyń jańa korpýsy jasaqtalýy kerek, onyń quramyna qalalar men aýdandardyń ákimderi kiredi. «A» korpýsyna úmitkerlerdi irikteýdi qatań júrgizýdi tapsyramyn. Olar halyq pen memleket múddesine berilgen kásibı qyzmetshiler bolýǵa tıis. Bıylǵy shildeden bastap aýyl ákimderine qosymsha 5000 adam, qarajat jáne ókilettik beriledi. Eń shalǵaı aýyldardyń turǵyndary jańa ózgeristerdiń tıimdiligin sezinýi kerek», - dedi Memleket basshysy.
***
«Naýryz merekesi qarsańynda qalyń buqaraǵa jol tartqan «Er Tóstik jáne Aıdahar» anımatsııalyq fılmi bir aptada 31,3 mln teńge jınady», - dep jazady «Aıqyn» gazeti. Qazaq anımatsııasynyń tarıhyndaǵy tuńǵysh tolyqmetrajdy fılmdi jasaýǵa 1,2 mıllıon teńge kóleminde qarjy jumsaldy. Ertegini ekranǵa shyǵarýǵa arnalǵan top quramyna 50-ge jýyq adam jumyldyrylyp, 3 jyl boıy eńbek etti. Bastapqyda mýltfılm 2D tehnologııasy boıynsha túsirilýi tıis edi, degenmen shyǵarmashylyq top 3D janrynda shyǵarýdy jón sanaǵan. Basylym betinde jaryq kórgen aqparat «Er Tóstik» bir aptada baıydy» degen taqyryppen berilgen.
26 naýryzdan bastap memlekettik qyzmet máseleleri boıynsha keıbir zańnamalyq aktilerge engizilgen ózgerister men tolyqtyrýlar kúshine endi. Memlekettik qyzmet isteri agenttiginiń tóraǵasy Álıhan Báımenov «jańa zańnama komandalyq «kóshi-qonǵa» túbegeıli tyıym salady» dep súıinshi surap jatyr (tek kómekshi, keńesshi jáne baspasóz hatshysyn taǵaıyndaýǵa ǵana ruqsat etiledi eken). Bul birinshi kezekte qatardaǵy memqyzmetkerler úshin jaǵymdy jańalyq bolǵany anyq. Sebebi «basshylyq aýysqan saıyn, jumyssyz qalamyz ba?» dep berekesi qashatyn solar ǵoı. Alaıda, komandany «kóshirip» aparýdyń amalyn tabatyndar tabylady deıtinder de joq emes. Bul jaıynda «Aıqyn» gazetiniń búgingi sanyndaǵy «Komandalyq «kóshi-qon» joıyla ma?» degen taqyryptaǵy maqalada baıandalǵan.
***
Shyny kerek, azyq-túlik baǵasynan bastap, jolaqysy, janar jaǵarmaı baǵasynyń birden kúrt kóterilýi degen buryndary jurtshylyqty dúr silkindiretin oqıǵa bolsa, shyny kerek, búginde qıt etse, oryn ala qoıatyn jaǵdaıǵa aınaldy. Búgin júz teńgeniń zaty, kúni erteń 120 bolyp ketse, eshkim tań qalmaıtyn da, qarsy shyqpaıtyn da boldy. Sebebi kónbeske laj joq, qarsy shyq, shyqpa, odan nátıje joq. Alaıda osy durys pa? Halyq qashanǵy jalaqysy óspeı, al baǵanyń úzdiksiz ósip otyrýyna shydaýy kerek? Osy máselege núkte qoıarlyq kez jetken joq pa? Jalpy baǵa saıasaty týraly másele «Alash aınasy» gazetiniń búgingi sanynda egjeı-tegjeıli talqyǵa salynǵan.
