Komandaǵa jasalǵan shabýyldan keıin Togo ókimeti ulttyq fýtbol quramasyn Afrıka Kýbogynan shaqyrtyp aldy
ASTANA. Qańtardyń 10-y. QazAqparat - Togolezdik fýtbolshylar mingen avtobýs Angolanyń soltústiginde qarýly separatısterdiń shabýylyna ushyraǵannan keıin, Togo Úkimeti ulttyq fýtbol quramasyn Afrıka Kýbogynan shaqyrtyp alý týraly sheshim qabyldady.
Qarýly shabýyldyń saldarynan jattyqtyrýshynyń kómekshisi men komandanyń baspasóz hatshysy oqqa ushyp, qurama qaqpashysy aýyr jaraqat aldy, oǵan operatsııa jasaldy. Afrıka Kýbogyna qatysýdan bas tartý týraly eldiń memlekettik mınıstri, aýmaqtyq ákimshilik mınıstri, úkimettiń baspasóz hatshysy Paskal Bodjona senbi kúni málim etti, dep habarlaıdy ITAR-TASS agenttigi.
«Mynandaı qaıǵyly oqıǵadan keıin biz Afrıka Kýbogyna qatysa almaımyz», dep atap kórsetken mınıstr, «bul qadamnyń óte qajet ekenin, sebebi qurama oıynshylarynyń júıkesine salmaq túskenin » aıtty.
Sportshylar mingen avtobýs Kongo Respýblıkasynyń shekrasyna jaqyn mańdaǵy Massabı eldi mekeninde shabýylǵa ushyrady. Bul oqıǵa úshin jaýapkershilikti Angolanyń soltústigindegi Kabında provıntsııasynda áreket etetin separatıstik top moınyna alyp otyr.
Dúısenbiden bastap Togoda úsh kúnge aza tutý jarııalanady. Bul týraly senbi kúni memlekettik telearna arqyly sóz sóılegen Togo Respýblıkasynyń premer-mınıstri Jılber Fossýn Ýngbo málim etti. Premerdiń aıtýynsha, «Úkimet avtobýsqa jasalǵan shabýyldyń qurbandaryn eske alý úshin úsh kúnge jalpyulttyq aza tutý jarııalaý týraly sheshim qabyldady». Togonyń fýtbol quramasy Afrıka Kýbogyna qatysý úshin Angolaǵa bara jatqan bolatyn.
