Qomaqty qaryzy bar áıel 3 jyl boıy Almatyda jasyrynyp júrgen - ShQO

ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri qomaqty qaryzy bar zeınetkerdi Almaty qalasynan tapty, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, Glýbokoe aýdandyq polıtsııa bóliminiń kóshi-qon qyzmetine 2 mln teńgeden astam qaryzyn ýaqtyly tólemegen 61 jastaǵy boryshkerge izdeý jarııalaý týraly jeke sot oryndaýshysynyń uıǵarymy kelip tústi.

«Belgili bolǵandaı, áıel adam aýdan turǵynynan qaryz alyp, 3 jyl boıy tólemeı, Almaty qalasynda jasyrynyp júrgen. Іzdestirý sharalaryn júrgizgen kóshi-qon qyzmetiniń mamandary boryshkerdiń ornalasqan jerin anyqtady. Endi qaryzdy óndirip alýmen sot oryndaýshylary aınalysady», - dedi oblystyq PD bastyǵy Saǵat Mádıev.

Jyl basynan beri kóshi-qon qyzmeti qaryzyn tólemeı sot oryndaýshylarynan jasyrynyp júrgen 160-tan astam adamdy tapqan.