Qomaqty qarajat halqymyzǵa paıda bermeıtin keıbir jobalarǵa jumsaldy - Erlan Saırov
«Elimizde óte kúrdeli jaǵdaılar boldy, biraq elimiz Qazaqstannyń eń negizgi qundylyǵy memlekettiń tutastyǵy ekenin, Qazaqstannyń memlekettiligi úshin árqaısymyz jaýapty ekenimizdi sezindik. Sonymen birge, Qazaqstan Respýblıkasynyń Prezıdenti Qasym-Jomart Kemeluly Toqaev memlekettiń tutastyǵyn saqtap qalý úshin, bizdiń memlekettiligimizdiń irgetasyn nyǵaıtý úshin mańyzdy qadamdarǵa bardy. 5 qańtar kúni Qazaqstan Prezıdenti qandaı jaǵdaı bolsa da elordada bolatynyn, halyqpen birge bolý Konstıtýtsııalyq mindeti ekenin málimdedi. Meniń oıymsha, osy málimdemeden keıin Qazaqstan halqy memlekettilik úshin, bizdiń elimizdiń aýmaqtyq tutastyǵy úshin árqaısy sanaly ári durys sheshim qabyldady», - dedi E. Saırov.
Onyń aıtýynsha, halqymyzdyń danalyǵy, qoǵamnyń sanasy jáne Qazaqstan Prezıdentiniń naqty ári ashyq ustanymy eldigimizdi, memlekettigimizdi saqtap qalýǵa alǵyshart jasady.
«Sonymen birge, eki kún buryn Memleket basshysy Parlamenttiń aldynda elimizdegi áleýmettik-ekonomıkalyq, qoǵamdyq-saıası protsester jóninde óziniń úndeýin jarııalady. Sol úndeýde elimizde júıeli áleýmettik-ekonomıkalyq, saıası reformalardyń bolatynyn aıqyndap berdi. Áleýmettik problemalar kóp, ony barlyǵymyz jaqsy bilemiz. Prezıdent áleýmettik teńdik jáne elimizdegi kedeılikti joıý máselesin óte joǵary minberden aıtty. Barlyǵymyzǵa belgili, terrıtorııalyq damýda úlken úılespeýshilik bar. Bul jóninde Qasym-Jomart Toqaev erekshe toqtalyp ótti», - dedi E. Saırov.
Onyń paıymynsha, 30 jylda eleýli qarajat halqymyzǵa materıaldyq paıda bermeıtin keıbir úlken jobalarǵa jumsaldy. Munyń nátıjesinde óńirler, aýdandar, aýyldar, shekaralyq aımaqtarda demografııalyq ári áleýmettik másele ýshyǵyp ketti.
«Elimizde qordalanǵan áleýmettik-ekonomıkalyq, saıası problemalardyń barlyǵynan shyǵýdyń jolyn Qasym-Jomart Kemeluly aıqyndap berdi. Endi Úkimettiń aldyndaǵy eń negizgi maqsat – Prezıdenttiń tapsyrmalaryn naqty jáne ýaqytynda oryndaý», - dedi depýtat.
