Qomaqty salyq tóleıdi: Qazaqstandaǵy iri kompanııalarǵa 600-den astam habarlama joldandy

ASTANA. KAZINFORM — Qarjy vıtse-mınıstri Erjan Birjanov iri kompanııalarǵa salyq somasyn ádiletti túrde tóletkizý sheshimine qatysty túsinik berdi.

Atap aıtqanda, aqpan aıynyń sońynda Premer-mınıstr Oljas Bektenov iri kompanııalardy eki apta ishinde salyq organdaryna qosymsha salyq deklaratsııalaryn tapsyrýǵa jáne ádiletti salyq somasyn tóleýge shaqyrǵan edi.

- Berilgen merzimi osy aptada aıaqtalady. Biz árbir salyq tóleýshimen jumys istedik. Búgingi kúni olarǵa 633 habarlama tarattyq, onyń 172-si qurylys salasyna qatysty. Jumys jalǵasyp jatyr, taıaý kúnderi nátıjesin jarııalaımyz», - dedi E. Birjanov Májilistiń jalpy otyrysynan keıin tilshiler suraǵyna jaýap bere otyryp.

Bul rette vıtse-mınıstr iri kompanııalardyń memleketke qaryz somasyn naqty jarııalamady.

- Olar qazir salystyrý jumystaryn júrgizip jatyr jáne tólem jasaıdy. Aqparatty osy aptada jarııalaımyz, - dedi ol.

Eske salsaq, bıyl 28 aqpanda Premer-mınıstr Oljas Bektenov vıtse-premer – ulttyq ekonomıka mınıstri Serik Jumanǵarınmen jáne qarjy mınıstri Mádı Takıevpen jumys keńesin ótkizdi. Salyq-bıýdjet reformasy jáne salyq túsimderin baqylaýdy kúsheıtý máseleleri qaraldy.

Osy oraıda Úkimet basshysy kásipkerlerdi eki aptada salyq somasyn ádiletti túrde tóleýge shaqyrdy.