Qomaqty qarjy salǵan úıden úmiti úzilgen qaraǵandylyq úleskerler Astanaǵa kelip muńyn shaqty
ASTANA. KAZINFORM – Sońǵy ýaqytta elimizde turǵyn úı qurylysyna salǵan qarajatyn daýlap júrgen úleskerler azaımaı tur. Búgin qaraǵandylyq turǵyndar bıliktiń nazaryn aýdartý úshin Astanada arnaıy baspasóz máslıhatyn ótkizip, qurylys kompanııasynan tıisti qarajatty qaıtaryp berýdi talap etti.
Qaraǵandydaǵy elıtalyq shaǵyn aýdandardyń biriniń úleskerleri kópqabatty úıdiń qurylysyna ájeptáýir qarajat salypty. Alaıda, qurylys jumystarynyń toqtap turǵanyna 2 jyl bolǵan. Sáıkesinshe, 9 qabatty turǵyn úıdiń tek eki qabaty ǵana salynǵan. Atap aıtsaq, «Manhetten» dep atalatyn aıaqtalmaǵan jańa ǵımarattyń qurylysy 2022 jyly bastalyp, byltyr qyrkúıekte kútpegen jerden toqtap qalǵan.
«Biz áleýetti satyp alýshylardy tartý úshin páterler men qurylys kompanııalaryn jarnamalaıtyn konsaltıngtik kompanııamyz. Búginde bizdiń kompanııamen 20-ǵa jýyq úlesker tartyldy, olar osy úıge shamamen 350 mln teńge ınvestıtsııalady. Satylym 2022 jyldyń qyrkúıeginde bastaldy. Qurylys alǵa jyljydy, ótken jyldyń tamyz aıynan bastap turǵyndardan alǵashqy ótinishter túse bastady. Qazan aıynda úı qurylysy kúptegen jerden toqtap qaldy. Mundaı jaǵymsyz jaǵdaıǵa alǵash ret tap bolyp otyrmyz. Biz qurylys kompanııasyna sendik. Máseleni anyqtaýǵa kiriskenimizde, bar problema jer ýchaskesinde ekeni belgili boldy. Qurylys kompanııasy qujattardy tapsyrǵan kezde jer ýchaskesine akt jáne jerdiń onyń menshiginde ekenin rastaıtyn kadastrlyq anyqtama berdi. Keıinirek biz kelisimshartta qurylys salýshy jerdiń tólemaqysyn 2023 jyldyń 1 tamyzyna deıin tóleýge mindetti ekenin bildik. Bul shartty olar oryndaǵan joq. Áý basta shart aıyrbastaý arqyly jasalǵanymen, qazir jer ıesi men qurylys kompanııasy ýchaske baǵasyna kelise almaı otyr», - dedi Qaraǵandy qalasy «Ipoteka ortalyǵy» JShS dırektory Aınur Súleımenova.
Onyń aıtýynsha, osy ýaqyt ishinde úsh áleýetti ınvestor qurylysty jalǵastyrýǵa daıyn bolǵan. Alaıda, ýshyqqan máseleler úleskerlerdiń pátersiz qalýyna ákep soǵýy múmkin.
«Jaǵdaı tyǵyryqqa tireldi. Qurylysty óz moınyna alýǵa daıyn áleýetti ınvestor bar bolǵanymen, áý basta qurylys jumystaryn qolǵa alǵan kompanııa jobany ótkizýge qulyqsyz. Telefon tutqasyn kótermeıdi. Biz polıtsııaǵa, oblys, qala ákimdikterine, prokýratýraǵa habarlasyp, tipti, Prezıdentke deıin hat jazdyq. Biz búgin Astanaǵa arnaıy jınalyp, quzyrly organdar máselege nazar aýdarady degen úmitpen keldik», - deıdi A.Súleımenova.
Belgili bolǵandaı, turǵyn úı kesheninen páter satyp alý úshin 100 paıyz tólem jasaǵan úleskerler de bar eken.
«Biz jer ýchaskesi máselesinde aldaý faktisi boıynsha polıtsııaǵa aryz jazdyq. Qurylys salýshy bizge jerdiń oǵan tıesili emes ekenin jáne aqysyn tólemegenin aıtqan joq. Áý basta ákimdiktegiler kompanııanyń úleskerlerdiń qarajatyn tartýǵa múmkindik beretin qujattary joq dep málimdep, aıyppul salǵan bolatyn. Osylaısha, ákimdik bastapqyda qurylys salýshynyń úleskerlerdiń qarajatyn tartýǵa quqyǵy joq ekenin bildi, dese de, úleskerlerge eskertpedi. Biz turǵyn úı keshenin jarnamalaıtyn kompanııa retinde qurylys kompanııasynan úlestik qurylysqa qatysty qujattardy talap etýge quqyǵymyz joq, - deıdi Qaraǵandy qalasyn «Ipoteka ortalyǵy» JShS zańgeri Arman Jambylov.
Úleskerler aqshany qaıtarý týraly sotqa deıingi shaǵym jazǵanymen, qurylys kompanııasynan jaýap joq. Qalalyq ákimdiktegiler qurylys kompanııasynyń qarjylyq problemalary bar ekenin, saldarynan jumysty jalǵastyra almaıtynyn alǵa tartyp otyr.
«Men kópbalaly anamyn, kámeletke tolmaǵan 4 balam bar. Men páterdi jańasyn satyp alý úshin sattym. Tolyq somany engizdim. Endi ne isteýim kerek? Biz jaldamaly páterlerde turamyz, bul óte qymbat. Úleskerlerdiń arasynda kópbalaly analar, zeınetkerler jáne jalǵyzbasty analar da bar. Bárimiz qurylys alańyna baryp turaıyq. Sonda ǵana bizdiń máselemizge bılik nazar aýdarar», - deıdi Qaraǵandy turǵyny Aısha Súleımenova.
