Komadan shyqqan Aıdos Erbosynuly qazaqstandyqtarǵa alǵys aıtty

ASTANA. QazAqparat – Tanymal qazaqstandyq boksshy Aıdos Erbosynuly otandastaryna úndeý jasap, kýbalyq boksshy Davıd Morrelmen bolǵan jekpe-jekten keıin alǵan aýyr jaraqatynan keıingi jaǵdaıy týraly aıtyp berdi, dep habarlaıdy QazAqparat Sports.kz saıtyna silteme jasap.

Suleimen Promotions komandasynyń baspasóz qyzmeti málim etkendeı, Aıdos Erbosynuly telefon arqyly qazaq halqyna sálem joldaǵan.

«Assalaýmaǵaleıkým, qazaq eli! Qaldaryńyz qalaı? Biz Allaǵa shúkir, táýir bolyp kele jatyrmyz. Osy jekpe-jekten keıin jaraqat alyp qaldyq. Aınalysyp júrgen sportymyz ońaı sport emes.Úlken sport bolǵandyqtan, mundaı jaǵdaılar bolyp turady. Maǵan duǵa tilep, tilektes bolǵan barshańyzǵa Alla razy bolsyn. Raqmet!» - dedi Aıdos Erbosynuly.

Eske sala keteıik, 6 qarasha kúni Aıdos kýbalyq Davıd Morrelden nokaýtpen jeńilgen bolatyn.

Sýperorta salmaq sanatyndaǵy jekpe-jek WBA nqsqasy boıynsha «turaqty» álem chempıony ataǵy úshin ótti.

Aıqastan keıin Erbosynuly shuǵyl túrde Mınneapolıs qalasyndaǵy aýrýhanalardyń birine jetkizildi. Oǵan «mıyna qan ketý» dıagnozy qoıyldy.

Budan ári ol jasandy komaǵa jiberilip, ota jasaldy.

Kúni keshe boksshy komandasynyń ókilderi onyń komadan shyǵyp, jaǵdaıy jaqsarǵanyn málimdegen edi.

Aıta keteıik, Prezıdent naǵyz bilek pen júrekti talap etetin sport túrimen kásibı túrde shuǵyldanyp júrgen Aıdos Erbosynulyna qoldaý bildirip, jedelhat joldady.

Sýper orta salmaqta álemniń absolıýtti chempıony Saýl «Kanelo» Alvares te aýyr nokaýt alyp aýrýhanaǵa túsken Aıdos Erbosynulyna qoldaý kórsetkenin habarlaǵan bolatynbyz.

Sondaı-aq qazaqstandyq boksshy Gennadıı Golovkın de otandasynyń tezirek aıyǵyp ketýine tilestestik bildirgen edi.

Foto: sports.kz