Komadaǵy azamattyń múgedektigin rásimdeýi úshin týysy ótinish beredi — zań jobasy

ASTANA. KAZINFORM — Elimizge ákelinetin dári-dármekterge arnalǵan sýbstantsııalardyń sapasyna baqylaý kúsheıtiledi. Bul týraly Májilistiń jalpy otyrysynda «QR-nyń keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» zań jobasyn tanystyrǵan depýtat Ashat Aımaǵambetov aıtty. 

— El ishinde óndiriletin dári-dármekterge arnalǵan sýbstantsııalardyń sapasyna baqylaýdy kúsheıtýdi usynyp otyrmyz. Endi elge kirgiziletin sýbstanııalar tekseristen ótip, arnaıy ruqsat alýy tıis. Dárilerdiń sapasy qaýipsizdik kepili, — dedi ol.

Sonymen qatar Májilis depýtaty kenetten aýyr jaǵdaıǵa túsip, uzaq ýaqyt komada jatqan azamattar múgedektikti rásimdeý úshin jeke ótinish bere almaıtyndyǵyna nazar aýdartty.

— Al ótinishsiz protsess bastalmaıdy. Sot arqyly qamqorshy taǵaıyndaý óte uzaq rásim. Osy ýaqyt ishinde otbasy áleýmettik qoldaýsyz qalady. Zań jobasynda mundaı jaǵdaıda jaqyn týystaryna nemese jubaıyna múgedektik belgileý úshin kýálandyrýdan ótýge ótinish berý quqyǵy beriledi, ıaǵnı endi ótinishti týysy bere alady. Biraq, ol ary qaraı tıisti rásimnen ótedi, komıssııa bolady. Olar naýqasty qarap, tıisti sheshim qabyldaıdy. Eger sheshim qabyldanyp, múgedektik beriletin bolsa, onda ol memleket taǵaıyndaǵan járdemaqysyn, tıisti tehnıkalyq kómegine alady, — dedi Ashat Aımaǵambetov.

Aıta keteıik, osy zań jobasy aıasynda dárilik zattardy tirkeý merzimi 2 ese qysqarady.