Medıtsınalyq qyzmetti tıisti dárejede ala almaǵan 2 500-ge jýyq ulytaýlyq basqa óńirge kóshti

ASTANA. KAZINFORM – Ulytaý oblysyndaǵy medıtsınalyq ınfraqurylym men ana men bala óliminiń kóbeıýine qatysty máseleler kezeń-kezeńimen sheshimin tabady. Bul týraly Densaýlyq saqtaý vıtse-mınıstri Tımýr Muratov  brıfıngte málimdedi. 

Brıfıng barysynda Ulytaý óńirinde medıtsınalyq qyzmetti tıisti dárejede ala almaǵan soń jáne ınfraqurylymnyń nasharlyǵy saldarynan 2 500-ge jýyq adam basqa óńirlerge qonys aýdarǵany jáne ana men bala óliminiń ósýi aıtylyp, naqty suraqtar qoıyldy. Vıtse-mınıstr bul máselelerdi júıeli sheshý arqyly halyqtyń ál-aýqatyn jaqsartý kózdelip otyr dedi.

— Ulytaý oblysy boıynsha master-plandy aıaqtadyq. Oblys turǵyndarynyń sany shamamen 230 myń adam. Bul — shaǵyn aımaq. Sol sebepti biz halyq sany men demografııalyq ósimdi eskere otyryp, qajetti medıtsınalyq nysandarǵa degen suranysty aıqyndadyq. Qazirgi ýaqytta bul jospar tolyq ázirlendi, — dedi Tımýr Muratov .

Onyń aıtýynsha, oblystyq aýrýhananyń ınfraqurylymyn jańartý qajet. Bul baǵytta óńir ákimdigimen birlesken jumys bastalyp ketken.

— Oblystyq aýrýhananyń janynan jańa ǵımarat salý josparlanyp otyr. Budan bólek, perınataldyq bólim salý qajet. Bul másele kelisilip, tıisti jumys bastalyp ketti, — dep naqtylady ol.

Buǵan deıin, densaýlyq saqtaý ınfraqurylymynyń tsıfrlyq kartasy ázirlenip jatyrǵanyn jazǵanbyz.