Qoljetimdilik pen sapa: Jezqazǵanda zamanaýı gıpermarket baǵany turaqtandyrýǵa kómektesedi
JEZQAZǴAN. KAZINFORM — 25 gektarǵa jýyq alańda 4 myńnan asa taýar túri shoǵyrlanǵan. «Qazaqmys» korporatsııasynyń qoldaýymen ashylǵan zamanaýı «Januıa» gıpermarketi Ulytaý óńirinde baǵanyń turaqtanýyna yqpal etedi.
Týra bir jyl buryn Keńgir aýylynda «Januıa» gıpermarketi ashyldy. Sonymen qatar, úlken saýda ortalyǵynyń ashylýymen Jezqazǵan jáne Sátpaev qalalarynda 14 shaǵyn market jumys isteı bastady. Olardyń basty maqsaty — óńir turǵyndaryn qoljetimdi baǵamen sapaly taýarlarmen qamtamasyz etý, satyp alýlarǵa qolaıly jaǵdaı jasaý jáne saýda men áleýmettik ınfraqurylymdy damytýǵa úles qosý.
— Jobany júzege asyrýǵa 1 mıllıard teńge ınvestıtsııalandy. Qarjylandyrýdy «Qazaqmys Korporatsııasy» JShS men «Tau mart 8» JShS qamtamasyz etip, ár tarap 500 mıllıon teńgeden saldy. Bul qarajat gıpermarket pen shaǵyn marketter jelisiniń tıimdi jumys isteýi úshin barlyq jaǵdaılardy jasaýǵa, bastapqy taýar qoryn satyp alýǵa, úı-jaılardy ishinara jóndeýge, jabdyqtar ornatýǵa jáne aýmaqty abattandyrýǵa baǵyttaldy, — deıdi «Tau mart 8» JShS dırektory Rýslan Qamzın.
Gıpermarket assortımenti 25 000-nan astam taýar ataýyn qamtıdy. Bul jezqazǵandyqtarǵa ónim tańdaýyn keńeıtýge múmkindik beredi.
Gıpermarket basshylyǵy suranysty muqııat baqylap, tutynýshylardyń artyqshylyqtaryn únemi taldap, ózgeristerge jedel den qoıyp otyrǵanyn atap ótý qajet. Mundaı tásil jergilikti óndirýshilerdiń ónimderin qosa alǵanda, ózekti jáne suranysqa ıe assortımentti qamtamasyz etýge múmkindik beredi.
Jergilikti taýar óndirýshilerdi qoldaý jáne baǵany turaqtandyrý — gıpermarket qyzmetiniń basym baǵyttarynyń biri.
— «Januıa» saýda jelisi áleýmettik mańyzy bar azyq-túlik ónimderiniń baǵasyn turaqtandyrýǵa belsendi qatysady. Óndirýshilerden tikeleı satyp alýlar men ashyq baǵa saıasatynyń arqasynda biz qoljetimdi baǵalardy ustap turýǵa jáne halyqqa baǵa júktemesin tómendetýge yqpal etemiz. Áleýmettik mańyzy bar azyq-túlik taýarlaryna ústeme baǵa 10%-dan aspaıdy, bul óńirdegi baǵanyń turaqtylyǵyn saqtaýǵa múmkindik beredi, — dep tolyqtyrdy Rýslan Qamzın.
Óńirlik taýar óndirýshilerden basqa gıpermarket basshylyǵy jergilikti turǵyndardy jumysqa ornalastyrýǵa da basa nazar aýdarady.
Búgingi tańda gıpermarket pen shaǵyn marketter jelisinde shtattyq keste boıynsha 183 jumys orny qarastyrylǵan. Basshylyqtyń aıtýynsha, saýda jelisi turaqty jumyspen qamtý, oqytý jáne mansaptyq ósý úshin múmkindikter týǵyza otyryp, jergilikti turǵyndardy basymdyqpen jumysqa ornalastyrady.
Osyǵan deıin Qazaqmys Balqash kólin saqtaý qoryn iske qosatyny habarlandy.