«Qoljetimdi ınternet» jobasy: Іri data-ortalyqtar salý josparlanýda
ALMATY. KAZINFORM – Digital Almaty forýmy alańynda qazaqstandyq taraptyń tóraǵalyǵymen aqparattyq-kommýnıkatsııalyq tehnologııalardy damytýǵa jaýapty Shanhaı yntymaqtastyq uıymyna múshe memleketterdiń mınıstrleri men vedomstvolary basshylarynyń jıyny ótti.
Forým barysynda, Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın ınnovatsııalyq ekojúıeni odan ári damytý jáne startap-jobalar men kompanııalarǵa jan-jaqty qoldaý kórsetý úshin ShYU-ǵa qatysýshy elder tehnoparkteriniń birlesken Alıansyn qurýdy usyndy.
«Alıanstyń negizgi maqsaty – startap-jobalardy jáne tehnoparkter tájirıbesin ózara almasý, startaptarǵa naryqqa shyǵýǵa kómek kórsetý, ortaq venchýrlyq qor qurý, birlesken ınkýbatsııalyq jáne akseleratsııalyq baǵdarlamalardy oqytý, 24/7 rejıminde qoljetimdiligi bar tegin jumys keńistigin qamtamasyz etý, startaptarǵa tegin baspana berý múmkindigin usyný, ShYU elderi músheleriniń tehnoparkterinde B2B kezdesýlerin uıymdastyra otyryp, sheshimderdi masshtabtaý, sondaı-aq granttar men qoldaý sharalaryn kózdeý», - dedi ol.
Mınıstrdiń aıtýynsha, jahandyq álemmen tehnologııalyq baılanysty jaqsartýda yntymaqtastyqtyń taǵy bir baǵyty talshyqty-optıkalyq baılanys jelilerin salý. Qazaqstannyń joǵary tranzıttik áleýetin paıdalaný bizdiń elderimiz úshin ınternet jelisine qosylý boıynsha birqatar eleýli artyqshylyqty qamtamasyz etedi jáne Eýrazııa qurlyǵynda trafıkti ótkizý jaǵdaıyn aıtarlyqtaı jaqsartýǵa múmkindik beredi.
Bul tranzıttik baılanys arnalaryn ártaraptandyrýǵa jáne memleketterimizdiń halyqaralyq derekter tranzıti naryǵyna qatysý aıasyn keńeıtýge múmkindik beredi.
Sondyqtan, Úndi muhıtyna shyǵatyn Reseı – Qazaqstan – Iran baǵyty boıynsha bizdiń elderimizdi baılanystyratyn talshyqty-optıkalyq baılanys júıesin salý múmkindigin qarastyrý usynyldy.
Sondaı-aq, «qoljetimdi ınternet» ulttyq jobasy aıasynda Qazaqstanda tranzıttik trafıkti óńdeý jáne saqtaý úshin iri data-ortalyqtar salý josparlanýda.
Jıyn barysynda qatysýshylar óz elderindegi aqparattyq-kommýnıkatsııalyq tehnologııalar salasyndaǵy ozyq tájirıbelerin, ShYU elderiniń ekonomıkasyn tsıfrlandyrýdaǵy tabysty keısterimen bólisti.
Taraptar tsıfrlyq ekonomıkany ornyqty damytý úshin tsıfrlyq áriptestikti ilgeriletý maqsatynda aqparattyq-kommýnıkatsııalyq tehnologııalar salasyndaǵy úzdik tájirıbelerdi almasýdy jalǵastyra otyryp, jolǵa qoıylǵan baılanystardy saqtaýǵa jáne nyǵaıtýǵa, sondaı-aq tsıfrlyq alshaqtyqty josparly túrde qysqartýǵa yqpal etýge ýaǵdalasty.
Jıyn sońynda taraptar ShYU-ǵa múshe memleketterdiń aqparattyq-kommýnıkatsııalyq tehnologııalardy damytýǵa jaýapty mınıstrlikteri men vedomstvolary basshylarynyń kelesi keńesi 2025 jyly Qytaı Halyq Respýblıkasynda ótetini jóninde kelisti.
