«Qoljetimdi ınternet»: Qazaqstan naryǵyna jańa operatorlar shyǵady
ASTANA. KAZINFORM – Astanada telekommýnıkatsııalyq ınfraqurylymdy damytý jáne «Qoljetimdi ınternet» ulttyq jobasyn iske asyrý máselelerine arnalǵan keńes ótti. Bul týraly Tsıfrlyq damý jáne jasandy ıntellekt mınıstrligi habarlady.
Jıynǵa Premer-Mınıstr orynbasary – Tsıfrlyq damý jáne jasandy ıntellekt mınıstri Jaslan Madıev tóraǵalyq etti. Keńeske memlekettik organdardyń, baılanys operatorlarynyń jáne jergilikti atqarýshy organdardyń ókilderi qatysty.
Keńeste eldegi baılanys salasynyń qazirgi ahýaly men aldaǵy kezeńge arnalǵan negizgi mindetter talqylandy. Basty nazar halyqty, sonyń ishinde aýyldyq jáne shalǵaı eldi mekenderdi sapaly ári turaqty ınternetpen qamtamasyz etýge aýdaryldy.
Baılanys salasyn damytý birneshe negizgi baǵyt boıynsha júzege asyrylyp jatyr. Atap aıtar bolsaq, ınternetti úı sharýashylyqtaryna deıin jetkizý, mobıldi jáne spýtnıktik ınternetti damytý, avtomobıl joldary boıynda baılanys ornatý, sondaı-aq Qazaqstannyń tranzıttik áleýetin arttyrý kózdelgen.
Aýyldyq eldi mekenderdi ınternetpen qamtý basym baǵyttardyń biri bolyp qala beredi. «Qazaqtelekom» AQ-nyń ınvestıtsııalyq kelisimi aıasynda 3 myńnan astam aýyldyq eldi mekendi joǵary jyldamdyqty ınternetke qosý josparlanǵan bolatyn. Sonymen qatar Dúnıejúzilik bankpen birlesip «sońǵy mılıany» sýbsıdııalaý jobasy iske asyrylyp jatyr. Onyń sheńberinde shaǵyn jáne orta baılanys operatorlarynyń kapıtaldyq shyǵyndarynyń 50 paıyzyna deıingi ótemaqysy qarastyrylǵan.
Mobıldi ınternetti damytý baǵytynda 2027 jylǵa deıin 3G tehnologııasynan 4G-ge kezeń-kezeńimen kóshý josparlanǵan. Sondaı-aq, halyq sany 250 adamnan asatyn eldi mekenderde 4G qamtý mindettemelerin oryndaý máseleleri qaraldy. Budan bólek, 5G jelilerin damytý jáne baılanys joq aımaqtardy qysqartý josparlary talqylandy.
Spýtnıktik ınternet shalǵaı jáne az qonystanǵan aýmaqtar úshin mańyzdy sheshim retinde qarastyrylyp jatyr. 2025 jyly 300-den astam aýyldyq eldi meken spýtnıktik ınternetpen qamtamasyz etildi. 2026 jyly naryqqa jańa operatorlardyń shyǵýy jáne Direct-to-Cell tehnologııasyn damytý josparlanǵan.
Sonymen qatar temirjol kóligin, týrıstik nysandardy jáne avtomobıl joldaryn baılanyspen qamtamasyz etý jobalary, onyń ishinde respýblıkalyq jáne oblystyq mańyzy bar trassalar boıynda antenna-machtalyq qurylystar salý máseleleri qaraldy. Jekelegen blokta derekterdi óńdeý ortalyqtaryn damytý jáne eldiń tranzıttik áleýetin arttyrý máseleleri talqylandy.
Keńes qorytyndysy boıynsha baılanys operatorlarymen jáne jergilikti atqarýshy organdarmen jumysty úılestirýdi kúsheıtý, sondaı-aq barlyq josparlanǵan jobalardy ýaqytyly iske asyrý boıynsha birqatar tapsyrma berildi.
Aıta keteıik, «Qoljetimdi ınternet» ulttyq jobasy aıasynda Qazaqstanda spýtnıktik tehnologııalardy paıdalaný arqyly 504 aýyldyq eldi meken ınternet jelisine qosyldy.