Qoljetimdi baǵa jáne keń tańdaý: Astanada demalys kúngi jármeńke ótip jatyr
ASTANA. KAZINFORM – Elordada 17-18 qańtar kúnderi dástúrli demalys kúngi aýyl sharýashylyǵy jármeńkesi ótip jatyr. Іs-shara otandyq óndirýshilerdi qoldaý jáne qala turǵyndaryn qoljetimdi baǵada jańa pisken ónimmen qamtamasyz etý maqsatynda uıymdastyrylǵan, dep habarlaıdy elorda ákimdiginiń resmı saıty.
Jármeńke 17 jáne 18 qańtar kúnderi saǵat 10:00-den 19:00-ge deıin Alash tasjoly, 35B mekenjaıynda ornalasqan Keryen Joly saýda ortalyǵynda jumys isteıdi.
Jurtshylyqqa yńǵaıly bolý úshin munda Qazaqstannyń ártúrli óńirlerinen kelgen fermerler men óndirýshilerdiń ónimderi usynylǵan. Kelýshilerge et jáne et ónimderi, kókónister men jemis-jıdekter, sút jáne un ónimderi, nan-toqash ónimderi, tabıǵı shyryndar, tosap pen djemderdiń keń assortımenti usynylady.
– Biz aýyl sharýashylyǵy jármeńkesin qala turǵyndary jańa pisken ónimdi arzan baǵada satyp alýy úshin ótkizip otyrmyz. Bul – fermerler úshin de yńǵaıly alań. Aýyl eńbekkerleri óz ónimderin deldalsyz, tikeleı qala turǵyndaryna sata alady, - dedi Keryen Joly saýda ortalyǵynyń kommertsııalyq dırektory ári jármeńke uıymdastyrýshysy Aıtýǵan Kúzerbaev.
Atalǵan naýqanǵa Aqmola, Pavlodar, Qaraǵandy, Abaı oblystary jáne basqa da óńirlerdiń ókilderi qatysyp jatyr. Negizgi basymdyq et ónimderine berilgen. Sonymen qatar Qyzylorda oblysynan kartop pen kúrish, Qaraǵandy men Pavlodardan un, Túrkistan jáne Almaty oblystarynan jemis-jıdek jetkizilgen. Qys mezgilinde jármeńkede ımporttyq ónimder de tómendetilgen baǵada usynylady.
Kásipkerler mundaı jármeńkeler satýshylar men satyp alýshylar úshin de tıimdi ekenin atap ótti.
– Biz úshin bul úlken qoldaý. Óz ónimimizdi kópshilikke usynýǵa múmkindik bar, al satyp alýshylar sapaly taýardy dúkendegiden arzan baǵaǵa alady. Ásirese shetelden ákelinetin taýarlar óte tıimdi – baǵasy birneshe ese tómen bolady, - dedi satýshylardyń biri Aısulý.
Jármeńkege kelýshiler de ónimniń túr-túrin jáne qyzmet kórsetý sapasyn joǵary baǵalady.
– Munda ettiń tańdaýy mol – jylqy eti, sıyr eti barlyǵy jańa ári sapaly. Qalada baǵa qymbat, al munda qoljetimdi. Satýshylar sypaıy, qyzmet kórsetý jaqsy, et Qazaqstannyń ár óńirinen jetkizilgen. Búgin Abaı oblysynan ákelingen etti tańdadym, ony buryn da alyp júrmin, - dep áserimen bólisti elorda turǵyny Aıgúl.
Qala turǵyndaryna yńǵaıly bolý úshin jármeńke ótetin oryn mańynan №7, 11, 39, 41, 45, 53, 59, 81, 307 jáne 317 baǵyttaǵy avtobýstar qatynaıdy.