«Qoljetimdi turǵyn úı» baǵdarlamasyna suralǵandardyń kópshiligi qatysýǵa daıyn - Saýalnama
ASTANA. 7 qyrkúıek. QazAqparat - QR Premer-Mınıstriniń Pm.kz resmı saıtyndaǵy saýalnamanyń qorytyndysy boıynsha, respondentterdiń kópshiligi (92 paıyzy) turǵyn úı qurylysynyń turǵyn úı qurylys jınaǵy júıesi boıynsha júrgiziletin jańa «Qoljetimdi turǵyn úı» baǵdarlamasyna qatysýǵa daıyn ekendigin málimdegen.
Atap aıtqanda, saýalnamaǵa qatysyp, suralǵandardyń 33 paıyzy eger memleket «Turǵyn úı qurylys jınaq banki» salymshylary jınaǵynyń saqtalýyna kepildik beretin bolsa, 20 paıyzy - turǵyn úı qurylysynyń sapasy jaqsy bolsa - turǵyn úı qurylysy baǵdarlamasynyń qatysýshysy bolýǵa tilek bildirgen. Al respondentterdiń 39 paıyzy eger atalǵan baǵdarlama boıynsha turǵyn úıdiń baǵasy naryq baǵasynan tómen bolsa ǵana baǵdarlama qatysýshysy bolady. Óz kezeginde suralǵandardyń 8 paıyzy turǵyn úı kredıtin alýǵa qulyqty emes.
Esterińizge sala keteıik, «Qoljetimdi turǵyn úı-2020» baǵdarlamasyn QR Úkimeti ústimizdegi jyldan bastap Memleket basshysynyń Qazaqstan halqyna arnaǵan «Áleýmettik-ekonomıkalyq jańǵyrtý - Qazaqstan damýynyń basty baǵyty» Joldaýyndaǵy tapsyrmalardy oryndaý maqsatynda júrgizip keledi.
Atalǵan baǵdarlama boıynsha, 9 jylda jalpy aýdany 69050 sharshy metr turǵyn úı salynady. Beriletin turǵyn úıdiń aýdany 35-ten 75 sharshy metrge deıingi, baǵasy 80-nen 100 myń teńgege deıingi kólemde, aı saıynǵy ortasha tólemaqy - 50 myń teńge kóleminde bolady. Jańa baǵdarlama sheńberinde josparlanǵan keń aýqymdaǵy turǵyn úı qurylysy qazaqstandyqtar úshin turǵyn úıdiń qoljetimdiligin arttyrýǵa múmkindik beredi.
