«Qoljetimdi turǵyn úı-2020» baǵdarlamasy boıynsha I jartyjyldyqta 4,4 myń páter tapsyryldy
ASTANA. 7 tamyz. QazAqparat - 2013 jyldyń 1 shildesindegi málimet boıynsha «Qoljetimdi turǵyn úı-2020» baǵdarlamasy aıasynda 4,4 myń páterden turatyn 54 turǵyn úı kesheni paıdalanýǵa berilgen. Bul týraly «Qazaqstan Turǵyn úı qurylys jınaq banki» AQ (QTQJB) basqarýshy dırektory Murat Sháripov málim ett, dep habarlady Primeminister.kz.
«6 aıda 4,4 myń páterden turatyn 54 turǵyn úı kesheni paıdalanýǵa berildi. Salymshylardyń bir bóligi óz qaryzdaryn alyp, úılerge qonystansa, bir bóligi qaryz alýǵa qujattaryn rásimdeýde. Keıbir páterler boıynsha ákimdikter quqyq ornatýshy qujattardy áli de rásimdeý ústinde», - dedi M.Sháripov.
Sonymen qatar, ol jyldyń sońyna deıin taǵy da 81 turǵyn úı paıdalanýǵa berilip, 6,5 myń klıent óz páterlerin alatynyn jetkizdi.
«Ózderińizge de belgili, úılerdiń qurylysyn ákimdikter júzege asyrady, al banktiń qyzmeti qarjylandyrý jáne turǵyn úıdi satyp alý. Barlyǵy 23 myńnan astam ótinish kelip tústi. Halyqtyń «Qoljetimdi turǵyn úı» baǵdarlamasyna qyzyǵýshylyǵy qarqyndy túrde artyp keledi. Eger qańtar aıynda adamdar oǵan belsendi qatyspaǵan bolsa, búgingi tańda keıbir óńirlerde 1 páterge 4-5 adam ótinish beredi. Konkýrs óte úlken», - deıdi QTQJB basqarýshy dırektory.
Budan ózge, ol búgingi tańda banktiń ákimdikterge 15,9 mlrd. teńge aýdarǵanyn habarlady, bul soma salymshylardyń, banktiń qarajattarynan jáne memlekettik bıýdjettiń nesıesinen turatynyn aıtty. Osy somanyń jartysyna jýyǵy - salymshylardyń aqshasy.
Jergilikti atqarýshy organdar jalpy 12 764 páterdiń qurylysyna 157 kelisim jasasty.
