«Qoljetimdi turǵyn úı-2020» baǵdarlamasy boıynsha bıyl jas otbasylar úshin 3,5 myńǵa jýyq páter salynady
ASTANA. 8 tamyz. QazAqparat - «Qazaqstan Turǵyn úı qurylys jınaq banki» AQ «Qoljetimdi turǵyn úı-2020» baǵdarlamasy aıasynda jas otbasylarǵa arnap turǵyn úı salýǵa jergilikti atqarýshy organdarmen kelisimder jasasty.
Bul týraly QTQJB basqarýshy dırektory Murat Sháripov málim etti, dep habarlady Primeminister.kz.
«Búgingi tańda jergilikti atqarýshy organdarmen jas otbasylarǵa arnalǵan 3,5 myń páter bolatyn 62 turǵyn úıdiń qurylysyna kelisimder jasalǵan», - dedi M.Sháripov.
Sonymen qatar, ol búgingi tańda qarjylandyrylǵan nysandardyń áli joq ekenin atap ótti. «Menińshe, áli erte. Jyl sońyna qaraı sáıkes nátıjeler bolady jáne jas otbasylar úılerdi jalǵa ala bastaıdy», - dep esepteıdi ol.
Oǵan qosa, M.Sháripov ár óńirdegi jaǵdaı ár túrli ekenin túsindirdi. «Keıbireýleri úıdi tapsyrýǵa daıyndalyp jatyr, al bireýleri qujattardy rásimdep, jas otbasylar arasynda konkýrs ótkizýde», - dep tolyqtyrdy basqarýshy dırektor.
Upaılardy esepteý jáne kezekti qalyptastyrýdy ákimdikter júzege asyratyny belgili, al banktiń mindeti tólem qabilettiligin rastaý, sondaı-aq turǵyn úı qurylys jınaq týraly kelisim-shart jasaý.
Jalpy alǵanda, jyl sońyna deıin Almaty oblysynda 120 páterden turatyn 2 úı, Soltústik Qazaqstan oblysynda 216 páterden turatyn 1 úı, Qostanaı oblysynda 352 páter bolatyn 7 úı, Atyraý oblysynda 234 páter, Qaraǵandy oblysynda 154 páterdiń qurylysy josparlanǵan.
