Qoljetimdi baspanalar sapaly salynýy tıis - Baýyrjan Baıbek
ALMATY. QazAqparat - Almaty ákimi Baýyrjan Baıbek 2017-2024 jyldary súrilýi tıis eski úılerge qatysty jasalǵan jańa baǵdarlama aıasynda qala aýmaǵyndaǵy 1 034 eski qurylysty qaıta jańartý boıynsha kóshpeli keńes ótkizdi. Qala basshysy jumys sapary barysynda Jandosov kóshesi boıyndaǵy, Súleımenov kóshesi men Şepkın kóshesiniń ortasyna «Eski úılerdi súrý» baǵdarlamasy boıynsha salynǵan úıdiń sapasyn synǵa aldy, dep habarlaıdy QazAqparat tilshisi ákimdiktiń baspasóz qyzmetine silteme jasaı otyryp.
«Qurylysty bulaısha júrgizýge bolmaıdy. Baǵasy tómen, qoljetimdi baspanalar da sapaly salynýy tıis», - dep atap ótti qala ákimi. Ol oryn alǵan barlyq kemshilikterdi túzetýdi, salynǵan úıler aınalasyna aǵashttar otyrǵyzýdy, balalar jáne sport alańdaryn salýdy, turǵyndardyń qozǵalysy qıyn toptary úshin qoljetimdi ortany uıymdastyrýdy jáne basqa da tıisti jaǵdaılardy jasaýdy tapsyrdy.
Aıta keteıik, búgingi saparynda qala basshysy 10 myń almatylyq otbasynyń 2017-2024 jyldary eski úılerdi súrý baǵdarlamasy boıynsha turǵyn úı jaǵdaılaryn jaqsartatynyn málimdedi.
Megapolıs basshysynyń aıtýynsha, qoljetimdi baǵa boıynsha qosymsha 30 myńnan astam páter salynady, qala turǵyndary jańa áleýmettik nysandarmen, mekteptermen, balabaqshalarmen, emhanalarmen, jańartylǵan ınjenerlik kommýnıkatsııalarmen, abattandyrylǵan aýmaqtarmen qamtamasyz etiledi.
Ol úshin aldaǵy jeti jyl ishinde qala ekonomıkasyna jalpy kólemi 400 mlrd teńge jeke ınvestıtsııa tartylyp, 70 myńnan astam jumys orny qurylady.
«Bizdiń basty maqsatymyz - turǵyn úılerdi jańartyp qana qoımaı, onyń baǵasyn tómendetý, jańa jumys oryndaryn ashyp, ınvestıtsııa tartý. Memleket basshysy tek «Nurly jer» baǵdarlamasy boıynsha ǵana emes, sonymen qatar bıýdjetten tys qarjy esebinen de qurylys salýdy tapsyrdy. Bizdiń qalada bul úshin barlyq jaǵdaılar bar, osy baǵyttaǵy jumystardy odan ári jalǵastyratyn bolamyz», - dedi Baýyrjan Baıbek.
Ol jańa úılerdiń jobalaryn jasaǵanda jáne qurylysty júrgizgende kommýnıkatsııa men jelilerge túsetin aýyrtpalyqty qatań eskerý qajettigin aıtty.
