Qoljetimdi baspanaǵa qatysty jańa baǵdarlama jyl sońyna deıin qabyldanady

ASTANA. QazAqparat - Qoljetimdi baspanaǵa qatysty jańa baǵdarlama jyl sońyna deıin qabyldanady. Bul týraly búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynan keıin jýrnalısterge bergen suhbatynda Ulttyq ekonomıka mınıstriniń orynbasary Qaıyrbek Óskenbaev málim etti.

Eske salaıyq, komıtet otyrysynda «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.

«Qazirgi kúni Úkimette Elbasy tapsyrǵan baǵdarlama qaralyp jatyr.Ondaǵy máselelerdiń barlyǵy maquldanǵannan keıin, resmı túrde habarlanatyn bolady. Baǵdarlama jyl sońyna deıin qabyldanady», - dedi mınıstr orynbasary.

Eske salaıyq, Prezıdent Nursultan Nazarbaev «Nurly jol - bolashaqqa bastar jol» atty Joldaýynda turǵyn úı ınfraqurylymyn nyǵaıtý máselesine toqtalyp, baspana qurylysy baǵdarlamasyn qaıta qaraýdy tapsyrǵan bolatyn. «Bizde qoljetimdi baspana boıynsha kóptegen ádister bar. Elimizde Turǵyn úı qurylys jınaq, ıpoteka, arendalyq baǵyttar qamtylǵan. Endi bizge basqa qyrynan qaraý kerek. Memleket áleýmettik arendalyq baspanany salyp, ony halyqqa satyp alý quqyǵymen uzaq merzimge jalǵa beretin bolady. Qazirgi kezde qoldanystaǵy júıe qomaqty qarjyny talap etedi. Bastapqy jarnany tóletkizedi, sodan keıin bankter kabaldy (kiriptarlyq) paıyzdardy bekitedi, ıaǵnı onyń deńgeıi 20 paıyzǵa jetedi. Adamdar ony tóleýge qaýqarsyz jáne problemalar týyndaıdy. Bul baǵdarlamalar qalady, olar dáýletti adamdar úshin qalypty. Al jańa baǵyttaǵy baǵdarlamany jas otbasylar úshin jáne baspanaǵa zárý azamattarǵa jasap jatyrmyz», - dedi Elbasy.

Prezıdenttiń sózine qaraǵanda, jańa baǵdarlama boıynsha baspana esh deldaldarsyz, barynsha tómen paıyzben beriledi. Nesıelik qyzmet etý 1-2 paıyz kóleminde bolýy múmkin. Osy baǵdarlama aıasynda turǵyn úıdi satyp alý quny tómendetiledi, bastapqy jarna tólenbeıdi.