Qoljetimdi baspanadan ınnovatsııany engizýge deıin: «Báıterek» holdıngi nemen aınalysady
ASTANA. QazAqparat - «Báıterek» ulttyq basqarýshy holdıngi qyzmetiniń spektory aýqymdy. Bul, birinshi kezekte, Qazaqstan Respýblıkasy Úkimetiniń negizgi qarjylyq ınstıtýttarynyń biri retindegi róline jáne qazaqstandyqtar úshin qoljetimdi baspanany qamtamasyz etý, kásipkerlikti damytý jáne otandyq eksporttaýshylarǵa qoldaý kórsetý sııaqty birqatar strategııalyq baǵyttardy iske asyrýmen baılanysty. Bul týraly QazAqparat Holdıngtiń baspasóz qyzmetine silteme jasap habarlaıdy.
«Báıterek» UBH» AQ-nyń negizgi mıssııasy - Qazaqstannyń turaqty ekonomıkalyq damýyna járdemdesý. Holdıngtiń maqsattaryna qol jetkizý quraly 11 portfeldik kompanııa bolyp tabylady, olardyń eń irisi - Qazaqstannyń Damý Banki, «Damý» kásipkerlikti damytý qory, Turǵyn úı qurylys jınaq banki, Tehnologııalyq damý jónindegi ulttyq agenttik.
Holdıng aldynda turǵan basym mindetterdiń qatarynda iri, sondaı-aq shaǵyn jáne orta kásiporyndardy qoldaýdy atap ótýge bolady. 2017 jyly «Qazaqstannyń Damý Banki» AQ tetikteri arqyly holdıng shıkizattyq emes sektorlardaǵy iri bıznes kásiporyndaryn 422 mlrd teńgege qarjylandyrdy. Óz kezeginde, «Damý» kásipkerlikti damytý qory arqyly shaǵyn jáne orta kásipkerlik sýbektilerine berilgen kredıtterdiń kólemi 548 mlrd teńgeni qurady.
Eksporttyq áleýetti júzege asyrýǵa yqpal etý sheńberinde Qazaqstannyń Damý Banki men KazakhExport arqyly holdıngtiń qoldaý sharalaryna ıe bolǵan kásiporyndardyń taýarlaryn eksporttaýdyń jalpy kólemi 2017 jyly 791 mlrd teńgeni qurady.
Turǵyn úı qurylys jınaq banki arqyly turǵyn úıdiń qarjylyq qoljetimdiligin qamtamasyz etý boıynsha holdıng kredıttik turǵyn úı qurylysyna qatysady, qurylys salýshylarǵa jeńildikti ıpotekalyq zaemdar men sýbsıdııalar beredi. 2017 jyldyń qorytyndysy boıynsha bank ıpotekalyq nesıe naryǵynda kóshbasshy atandy, bul eldegi barlyq ıpotekalyq kredıtterdiń 76%-yn qurady.
Transfert jáne ınnovatsııalardy engizý salasynda Tehnologııalyq damý jónindegi ulttyq agenttik arqyly qoldaý alǵan kásiporyndar shyǵaratyn ınnovatsııalyq ónim kólemi ótken jyly shamamen 48 mlrd teńgeni qurady.
Holdıng qyzmetiniń negizgi baǵyttary men portfeldik uıymdarynyń mamandanýy týraly ınfografıkamyzda anyq kórsetilgen.
