Qoljetimdi baspana baǵdarlamasyn oryndamaǵan ákim orynbasary qyzmetinen ketedi
ASTANA. 30 mamyr. QazAqparat - Birinshi jartyjyldyqtyń qorytyndysy boıynsha «Qoljetimdi baspana-2020» baǵdarlamasyn oryndamaǵan ákim orynbasaryn qyzmetinen bosatý usynylady.
Búgin Parlament Májilisiniń jalpy otyrysynda Úkimet basshysynyń birinshi orynbasary - Óńirlik damý mınıstri Baqytjan Saǵyntaev osylaı málim etti. Eske salsaq, Májiliste QR Úkimeti men Respýblıkalyq bıýdjettiń atqarylýyn baqylaý jónindegi esep komıtetiniń 2012 jylǵy bıýdjettiń atqarylýy týraly esepteri talqylanǵan bolatyn.
Talqylaý barysynda depýtat Vladıslav Kosarev kóptegen qazaqstandyqtar úshin baspana máselesi asa ózekti ekenin aıta kele, bıýdjetten turǵyn úı salýǵa qajetti qarajat bólingenin, alaıda onyń bir bóligi ıgerilmeı jatqanyn alǵa tartty. «Soǵan qaraǵanda, qoljetimdi baspana Astana men Almaty qalalarynan basqa óńirlerge kerek emes tárizdi. Dál osy qarjyny ıgermegeni úshin qansha sheneýnik jaýapkershilikke tartyldy? Jalpy bundaı mańyzdy baǵyttaǵy qarjynyń durys ıgerilýi qashan retteledi?», - dedi depýtat V. Kosarev.
Óz kezeginde Úkimet basshysynyń orynbasary arnaıy usynys ázirlengenin aıtyp, aldaǵy ýaqytta jaýapkershilikke qatysty máseleler sheshimin tabatynyn atap ótti. «Biz usynys engizdik, ony Premer-Mınıstr qoldady. Soǵan oraı, jarty jyldyqtyń qorytyndysy boıynsha Prezıdent Ákimshiliginiń jetekshisiniń atyna baspana baǵdarlamasyn oryndamaǵany úshin jaýapty oblys ákimderiniń orynbasarlaryn jumystan bosatý týraly usynys jasaıtyn bolamyz», - dedi Baqytjan Saǵyntaev.
