«Qoljetimdi baspana-2020» baǵdarlamasynyń Jol kartasy jasaldy
ASTANA. 22 shilde. QazAqparat - 2012 jyly Qazaqstanda turǵyn úı qurylysyn damytý jónindegi «Qoljetimdi baspana-2020» baǵdarlamasy bastaldy.
Jáne ony iske asyrý úshin «Jol kartasy» - baǵdarlamany iske asyrý jónindegi is-qımyldardyń jospary jasalyp otyr, dep habarlady pm.kz saıty.
І kezeńde (1 shildege deıin) oblystar men Almaty jáne Astana qalalarynyń ákimdikteri oblystarǵa qarasty qalalar men aýdandardaǵy turǵyn úı qurylystarynyń óńirlik josparlaryn ázirledi. Al ІІ kezeńde - 1 shilde men 1 tamyzdyń aralyǵynda - óńirler Qurylys jáne TKSh isteri agenttigimen birlese otyryp turǵyn úı qurylysynyń oblystyq josparlaryn jasaýlary tıis.
Atap aıtqanda, ákimdikter eldi mekenderde turǵyn úı qurylysyna jaraıtyn jer telimderiniń bar-joqtyǵy, jer telimderiniń ınjenerlik-kommýnıkatsııa ınfraqurylymdarymen qamtylýy, jer telimderiniń túgendelýi, sondaı-aq bas josparlarǵa ózgertýler engizý qajettiligi týraly málimetterdi, jobalaý jáne taǵy basqa qujattardy tapsyrady.
Oǵan qosa, baǵdarlamanyń barlyq baǵyty boıynsha 2020 jylǵa deıin eldi mekender bólinisinde jáne jyldar boıynsha iske qosylatyn turǵyn úı kólemderi boıynsha málimetter ázirlenedi. Jáne jańa qurylysty eskere otyryp sýmen jáne energııa resýrsymen qamtamasyz etý máselesi boıynsha aqparat beriledi. Sonymen qatar, qurylys materıaldary óndirisin damytý jáne zamanaýı úı qurylysy kombınattaryn salý máseleleri zerdelenýde.
Aıta ketý kerek, baspana qoljetimdiligin qamtamasyz etýdiń mańyzdy sharttarynyń biri jer telimderimen jáne ınjenerlik-kommýnıkatsııalyq ınfraqurylymdarmen qamtamasyz etý bolyp tabylady. Qurylys jáne TShK isteri jónindegi agenttiktiń aqparaty boıynsha, jańa qurylystar salynyp jatqan aýdandardy sáıkes ınfraqurylymdarmen barynsha qamtý úshin 2014 jyldan bastap ınjenerlik-kommýnıkatsııalyq ınfraqurylymdy qarjylandyrý somasyn 100 mlrd. teńgege deıin ulǵaıtý josparlanýda.
Sondaı-aq «Qoljetimdi baspana-2020» baǵdarlamasy boıynsha eski jáne apatty jaǵdaıdaǵy úılerdi súrip tastaý sharalary da qarastyrylǵan. 2013 jyldan bastap Astana qalasynda jáne Mańǵystaý oblysynda osyndaı jobalardy iske asyrý josparlanyp otyr.
Agenttiktiń deregi boıynsha, Astanada 2 978 úı qaıta jańartýdy jáne súrip tastaýdy qajet etedi. Olardyń ornyna jobalanyp otyrǵan turǵyn úılerdiń aýdany 3,1 mln. sharshy metrdi shamalaıdy. Al Mańǵystaý oblysynda ilki jobalarǵa Aqtaý jáne Jańaózen qalalaryn qatystyrý qarastyrylýda jáne Aqtaýda apatty jaǵdaıdaǵy 14 úı súrip tastalmaq. Munymen qosa, Aqtaýda buzylatyn úılerdiń turǵyndary men Jańaózen qalasynan qonys aýdarylatyn turǵyndarǵa baspana salý josparlanýda.
"Qoljetimdi baspana-2020" baǵdarlamasy Elbasynyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Joldaýymen júktelgen tapsyrmalar boıynsha iske asyrylýda jáne oǵan sáıkes 2020 jylǵa deıin Qazaqstandaǵy qurylystyń kólemin jylyna 10 mln. sharshy metrge jetkizý josparlanýda.
