«Qoljetimdi baspana-2020» baǵdarlamasyna jas otbasylarǵa qatysty ózgerister engizildi

ASTANA. QazAqparat - Jyl saıyn «Qoljetimdi baspana-2020» baǵdarlamasy boıynsha turǵyn úıdi tapsyrýǵa jarty jyl qalǵanda jas otbasylardan qujattardy qabyldaý merzimi jarııalanady. Bıyl qujattardy 2-14 maýsym aralyǵynda tapsyrýǵa bolady. Sondyqtan olardy qazirden bastap jınaý kerek, dep habarlaıdy astana.gov.kz.

«Atalǵan baǵyt boıynsha Baǵdarlamaǵa Qazaqstan Respýblıkasynyń nemese oralman mártebesi bar azamattar, ne bolmasa bir balasy bar adamdar qatysa alady. Erli-zaıyptylardyń ekeýiniń de jasy 29-dan aspaý kerek», - dedi Astana qalasynyń Turǵyn úı basqarmasynyń basshysy Serik Ospanov «Báıterek» halyqaralyq medıa ortalyǵynda ótken brıfıngte. Ospanovtyń aıtýynsha, bıyl baǵdarlama boıynsha 672 páter beriledi, sonyń ishinde 1 bólmeli 134 (40 sharshy m deıin), 2 bólmeli 380 (60 sharshy m deıin) jáne 3 bólmeli 158 páter (80 sharshy m deıin). Arendalyq turǵyn úı Tilendıev dańǵyly men Saraıshyq kóshesiniń ońtústigine qaraı ornalasqan jáne jyl sońyna deıin tapsyrylady. 8 jyl ótken soń jas otbasylar páterdi satyp alý múmkindigine ıe bolady. Baǵdarlamaǵa engizilgen ózgeristerge sáıkes, jas otbasy keminde eki jyl nekede turǵan jáne Astana qalasynda keminde eki jyl tirkelimi bolýy tıis. Qatysýshylar jınaǵan baldar boıynsha irikteledi. Qujattar tómendegi mekenjaılar boıynsha Halyqqa qyzmet kórsetý ortalyqtarynda qabyldanady: Dostyq kóshesi, 13 úı, Bógenbaı dańǵyly, 23 úı; Sátbaev kóshesi, 25 úı.