«Qoljetimdi baspana-2020» baǵdarlamasy ІІ toqsanynda qabyldanady
ASTANA. 2 maýsym. QazAqparat - Qazaqstanda Elbasynyń tapsyrmasy boıynsha «Qoljetimdi baspana-2020 jańa turǵyn úı qurylysy baǵdarlamasy jasalýda. 2014 jylǵa deıin Baǵdarlama aıasynda jalǵa beriteni baspananyń deńgeıi 1 mln. sharshy metrge, al 2020 jylǵa qaraı turǵyn úı qurylysynyń aýdany 10 mln. sharshy metrge deıin jetedi dep josparlanýda, dep habarlady pm.kz saıty.
Esterińizge sala keteıik, el Úkimeti «Qoljetimdi baspana-2020» baǵdarlamasynyń jobasyn Memleket basshysynyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýymen júktelgen tapsyrmaǵa sáıkes ázirlep jatyr.
Memlekettik qoldaýdyń aıasynda turǵyn úı qurylysy men onyń tólemaqysynyń basymdyqty kórsetkishteri anyqtaldy. Qurylys jáne TKSh isteri jónindegi agenttiktiń aqparaty boıynsha, baspananyń aýdany 35 sharshy metrden 75 sharshy metrge deıin bolady, shekti quny - 80-100 myń teńge/sharshy metr, al ortasha aılyq tólemi - 50 myń teńge.
Baǵdarlama jobasy boıynsha, baspanalar birneshe jolmen satylatyn bolady: «Turǵyn úı qurylys jınaq banki» jelisi boıynsha - barlyq sanattaǵy azamattarǵa, osy bank jelisi arqyly - jas otbasylarǵa, «Qazaqstandyq ıpotekalyq kompanııa» AQ jelisi boıynsha - jergilikti atqarýshy organdarda baspanaǵa kezekte turǵandarǵa. «Qoljetimdi baspana-2020» baǵdarlamasy jumys isteıtin 4 baǵyt boıynsha: jalpy aýdany 40 sharshy metrdi quraıtyn páter úshin ortasha aılyq tólem 30 myń men 50 myń teńgeniń aralyǵynda bolady dep kútilýde.
Oǵan qosa, 2015 jylǵa qaraı «Turǵyn úı qurylys jınaq banki» jelisi boıynsha turǵyn úı qurylysynyń aýqymyn 530 myń sharshy metrge nemese jyl saıyn 6,5 myńnan astam páterge jetkizý josparlanýda. Onyń ishinde 3 myń páter nemese 200 myń sharshy metri - jas otbasylarǵa arnalǵan.
Baǵdarlamanyń eń perspektıvaly baǵyttarynyń biri «Qazaqstandyq ıpotekalyq kompanııa» jelisi arqyly jalǵa beriletin turǵyn úılerdiń qurylysyn damytý bolyp otyr. Bul baǵyt boıynsha jylyna 530 myń sharshy metrge deıin baspana salý josparlanýda.
Kelesi baǵyt - baspana kezeginde turǵandarǵa arnalǵan jalǵa beriletin turǵyn úılerdiń qurylysy. 2014 jyldan bastap jyl saıyn 275 myń sharshy metr baspana nemese 4500 páter salý josparlanýda, qazir bul kórsetkish 2-2,5 myń páterdi quraıtynyn aıta ketý kerek.
«Qoljetimdi baspana-2020» baǵdarlamasy 2012 jyldyń ІІ toqsanynda qabyldanady.
