Qolyna sábı ustaǵan áıeldiń qymbat ishimdik urlaǵany vıdeoǵa túsip qaldy

NUR-SULTAN. QazAqparat – Elordadaǵy sýpermarketterdiń birinde ákki ury qolyndaǵy sábıin paıdalanyp, sýpermarketten qymbat ishimdik urlady. Bul týraly Nur-Sultan qalasy Polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.

«Sýpermarkettiń saýda zalyndaǵy beınebaqylaý kameralaryna qymbat alkogoldi urlaý faktisi tirkeldi. Kadrda jas balasy bar áıeldiń sóredegi vıskı qoraptaryn ashqanyn kórýge bolady. Shólmekti kassadan kedergisiz alyp ótý úshin ol qorǵanys trekerin tispen alyp tastamaq bolǵan. «Chıvas» markaly vıskı magnıtten ajyratylǵan soń kúdikti kúrteshege jasyrǵan shólmekti balasymen kólegeılep, kassadan shyǵyp ketken», - dep jazady departamenttiń baspasóz qymeti.

Jedel-izdestirý kezinde polıtsııa qyzmetkerleri buryn birneshe ret sottalǵan 24 jastaǵy astanalyq áıeldi ustady.

«Áıel polıtsııanyń nazaryna 2016 jyly iligip, birneshe ret urlyq pen alaıaqtyq baptary boıynsha sottalǵan. Qazir atalǵan fakti boıynsha sotqa deıingi tergeý amaldary júrgizilýde. Kúdikti óz kinásin moıyndady. Endi onyń elorda aýmaǵynda tirkelgen osyǵan uqsas qylmystarǵa qatystylyǵy tekserilýde.

Nur-Sultan qalasynyń Polıtsııa departamenti saýda oryndarynyń ıelerine qyraǵy bolýǵa keńes beredi. Taýarlardyń qaýipsizdigin qamtamasyz etý úshin elektrondy qorǵanys júıelerinen basqa, beınebaqylaý júıelerin ornatý qajet» - dep jazady vedomstvodan.