Kolýmbııanyń soltústiginde 2 myńnan astam adam sý tasqynynan zardap shekti
ASTANA. KAZINFORM — Kolýmbııanyń soltústigindegi Santa-Marta qalasynda kúshti nóser jańbyrlary saldarynan sý tasqyny bolyp, onyń saldarynan 2 myńnan astam adam zardap shekti. Bul týraly jergilikti bılik habarlady, dep jazady Anadoly.
Santa-Marta qalasynyń táýekelderdi basqarý jáne klımattyń ózgerýine beıimdelý basqarmasynyń basshysy Aleks Velaskes baspasózge bergen málimdemesinde sý tasqyny saldarynan qalada tótenshe jaǵdaı jarııalanǵanyn aıtty.
Onyń sózinshe, ondaǵan aýdan sý astynda qalyp, zardap shekkenderdiń sany 2 myńnan asty.
Santa-Marta qalasynyń ákimi Karlos Pınedo tórt saǵat ishinde qalada metr kvadratqa 155 mıllımetr jaýyn-shashyn túskenin atap ótti. Onyń aıtýynsha, bul kórsetkish «óte joǵary» deńgeıde.
Qalada kóptegen zaqymdaný týraly habarlar tústi, barlyq jedel qyzmetter apat saldaryn joıýǵa jumyldyrylǵan.
Kolýmbııa prezıdenti Gýstavo Petro X platformasynda jarııalaǵan pikirinde Santa-Martadaǵy tabıǵı apat klımattyq daǵdarystyń saldary ekenin aıtty.
Memleket basshysy óńirge barlyq qajetti kómek kórsetiletinin atap ótti.
Budan buryn 24 maýsymda Kolýmbııanyń Medelın qalasynda qatty jaýyn-shashynnan keıin bolǵan kóshkin saldarynan qaza tapqandar sany 22 adamǵa jetkenin jazǵan edik.